Fýtboldan Qazaqstan chempıonaty 3 tamyzda qaıta jalǵasady
NUR-SULTAN. QazAqparat - Fýtboldan Premer-lıga komandalary arasyndaǵy Qazaqstan chempıonaty 3 tamyzda qaıta jalǵasady, dep habarlaıdy QazAqparat tilshisi Qazaqstan fýtbol federatsııasyna silteme jasap.
Esterińizge sala ketelik, dop dodasy 8 naýryzda bastalǵan bolatyn. Eki týrdan keıin elimizde koronavırýs pandemııasynyń órshýine baılanysty ol keıinge shegerildi . Al 1 shildede úshinshi týr oıyndary ótti. Odan keıin elimizde karantındik sharalardyń kúsheıýine baılanysty dop dodasy taǵy da keıinge shegerildi.
Endigi kezekte Qazaqstan chempıonatyn ońtústik astana - Almaty qalasynda ótkizý josparlanyp otyr. Oıyndar Almaty jáne oǵan irgeles ornalasqan Talǵar qalalarynda ótkiziledi.
Osyǵan baılanysty Qazaqstan fýtbol federatsııasynyń bas hatshysy Azamat Aıtqojın otandyq klýbtarǵa úndeý joldady. Onda dop dodasyn jalǵastyrýdyń múmkindigi jaıynda aıtylǵan.
«Oıyndar Almaty men Talǵar qalalarynda ótedi. Bul chempıonatty jalǵastyrý baǵytyndaǵy eń qolaıly sheshim ekenin aıta ketý kerek. Endigi kezekte otandyq klýbtar úshin qatynaý, fýtbolshylardy oıynnan keıin qalpyna keltirý boıynsha qolaıly jaǵdaı jasalady. Oǵan qosa komandalar ýaqyt pen qarjyny únemdeıdi. Jeke avtobýsty paıdalaný, bir bazada turý jáne ózge adamdarmen qarym-qatynasty azaıtý jaǵy eskeriledi. Karantın sharttaryn saqtaý - epıdemıologııalyq qaýipsizdik turǵysynan durys sheshim», - dedi Azamat Aıtqojın klýb basshylarymen ótken beınekonferentsııada.
Barlyq komandalardyń memlekettik organdarmen kelisilgen sanıtarlyq protokoldyń barlyq sharttaryn oryndaýy basty nazarǵa alynady. Fýtbolshylar oıynnan buryn PTR test tapsyrady. Olardyń densaýlyǵyn baqylaý árbir klýbtyń medıtsına qyzmetkerlerine júkteledi.
Aıta keterligi, mundaı jaǵdaı otandyq fýtbol tarıhynda alǵash ret kezdesip otyr. Qazaqstan chempıonaty tuńǵysh márte bir qalada ótedi. Chempıonattyń barlyq oıyny respýblıkalyq «Qazsport» telearnacynan tikeleı efırde kórsetiledi.
