Fýtboldan Qazaqstan chempıonaty: «Turan» men Jetisý cyrt alańda jeńiske jetti
ASTANA. KAZINFORM – Úshinshi týrdyń alǵashqy oıyny «Shahter» men «Turan» komandalary arasynda ótti. Kezdesý túrkistandyq klýbtyń jeńisimen aıaqtaldy.
Qos gol da oıynnyń birinshi bóliginde soǵyldy. Matchtyń 7 mınýtynda Leonardo Vaka mergendigimen kózge tússe, 39 mınýtta Branıslav Slýka esepti eseleı tústi. Ekinshi taımda gol soǵylmady. Qazaqstandyq bapker Rınat Alıýetov baptaıtyn túrkistandyq komanda osy jeńisinen keıin 5-orynǵa kóterildi. Al, qatarynan úsh oıynda jeńiliske ushyraǵan qaraǵandylyq komanda týrnırlik kestede sońǵy orynǵa jaıǵasty.
Úshinshi týrdyń ekinshi kezdesýi Atyraý qalasynda ótti. Munaıshy stadıonyndaǵy oıynda alań ıeleri «Jetisý» komandasyna ese jiberdi.
Kezdesýdegi jalǵyz goldy 73 mınýtta Serikjan Mýjıkov soqty. Onyń buryshtamadan kótergen doby qaqpadan tabyldy. «Atyraý» fýtbol klýbynyń sapynan 77 mınýtta Igor Stasevıch 11 metrlik aıyp dobyn sátti oryndaı almady. Osylaısha taldyqorǵandyq ujym syrt alańda mańyzdy úsh upaıǵa qol jetkizdi.
Bul jeńisinen keıin Qaırat Nurdáýletov baptaıtyn komanda týrnırlik kestede 9-orynǵa kóterilse, Atyraý komandasy 10-orynǵa tómen syrǵydy.
Erteń «Qyzyljar» (Petropavl) men «Tobyl» (Qostanaı), «Aqtóbe» men «Jeńis» (Astana), «Astana» men «Elimaı» (Semeı), «Ordabasy» (Shymkent) men «Qaırat» (Almaty) komandalary arasynda úshinshi týrdyń qalǵan oıyndary ótedi.
Aıta keteıik, buǵan deıin fýtboldan Qazaqstan Premer-lıgasy qaıta jalǵasatynyn habarlaǵan bolatynbyz.
