Fýtboldan Qazaqstan chempıonaty: BIIK kósh basyna shyqty

ASTANA. KAZINFORM — Fýtboldan áıelder arasyndaǵy Qazaqstan chempıonatynyń jetinshi týrynyń alǵashqy oıyn kúni ótti.

Atalǵan týrda shymkenttik BIIK komandasy syrt alańda Qostanaıdyń «Tobylyn» 18:0 esebimen jeńdi. 

Kezdesý barysynda shymkenttik komanda birinshi kezeńde jaýapsyz on gol soqsa, ekinshi kezeńde taǵy segiz goldy toǵytty.

Atalǵan jeńisinen keıin olar týrnır kestesinde 19 upaımen birinshi orynǵa kóterildi.

Sondaı-aq búgin «Atyraý» túrkistandyq «Tomırıs-Turannan» 0:7, semeılik «Elimaı» «Aqtóbeden» 0:5, astanalyq «Jeńis» Almatynyń «Qaırattan» 0:1 esebimen jeńilip qaldy. 
Endi 23 mamyrda «Jetisý» (Taldyqorǵan) men «Astana», «Qaısar» (Qyzylorda) men «Qyzyljar» (Petropavl), «Oqjetpes» (Kókshetaý) men «Ulytaý» (Jezqazǵan) komandalary kezdesedi.

Federatsııa talabymen erler klýbtarynyń janynan áıelder quramalary qurylǵan. Ótken jyly chempıonatqa tek 4 óńirden 5 komanda ǵana tirkelgen edi.

Ár komanda sapynda keminde qazaqstandyq fýtbol mektebiniń 13 túlegi bolýǵa tıis degen talap qoıylyp otyr. Oǵan 2009 jyly jáne odan erte dúnıege kelgen fýtbolshylar qatysa alady.

Eske salsaq, fýtboldan Qazaqstan áıelder quramasy mamyr aıynda Qyrǵyzstanmen eki joldastyq kezdesý ótkizedi.