Fýtboldan Qazaqstan chempıonaty bastalady

ASTANA. KAZINFORM - Búgin fýtboldan Premer-lıga komandalary arasyndaǵy Qazaqstan chempıonaty jalaýyn kóteredi. 

Alǵashqy týr 1 jáne 2 naýryz kúnderine belgilengen.

Dop dodasynyń shymyldyǵyn búgin, 1 naýryzda 14.30-da elordalyq «Astana» men «Jeńis» komandalary ashady.

Jeti dúrkin el chempıony atanǵan «Astana» Premer-lıgaǵa jańadan oralǵan «Jeńistiń» osal tusyn taba ala ma? Ony búgingi oıyn barysynda anyqtaıtyn bolamyz.

Dál sol kúni 17.00-de «Qaısar» (Qyzylorda) men «Aqtóbe» jasyl alańǵa shyǵady.

Al 2 naýryzda «Qaırat» (Almaty) pen «Qyzyljar» (Petropavl), «Elimaı» (Semeı) men «Atyraý», «Ordabasy» (Shymkent) men «Shahter» (Qaraǵandy), «Tobyl» (Qostanaı) men «Turan» (Túrkistan) sheberlik baıqasady.

Oıyndardy «Qazsport», «Qsport» jáne jańa «Qfootball» telearnalary tikeleı efırde usynady.

Aıta ketsek, bıyl el birinshiliginde 14 komanda baq synaıdy degen jospar boldy. Degenmen qarjy múmkindigine baılanysty aldymen Túrkistan oblysynyń «Maqtaral» klýby odan bas tartty.

Al onyń ornyna oınaýǵa múmkindik alǵan Pavlodar oblysynyń «Aqsý» klýby da Premer-lıgada oınaı almaıtynyn málimdedi.