Fýtboldan Qazaqstan birinshiligi: «Jetisý» «Qaısardan» basym tústi
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiliginiń on úshinshi týrynda alǵashqy oıyn aıaqtaldy, dep habarlaıdy QazAqparat tilshisi.
Bul joly Taldyqorǵanda jergilikti «Jetisý» Qyzylordanyń «Qaısar» komandasyn qabyldady. Týrnır kestesinde kósh sońynda kele jatqan komandalar arasyndaǵy kezdesýde alań ıeleri basymdyq tanytty.
Oıynnyń 31-mınýtynda Adam Adahadjıev esep ashsa, 59-mınýtta Aslan Ádil esepti ústemeleı tústi. Buǵan «Qaısar» tarapynan jaýap berýge tyrysty. Degenmen oılaǵan maqsatyna jete alǵan joq. «Jetisý» qarsylasynan 2:0 esebimen basym tústi.
Sondaı-aq, búgin 21.00-de «Aqtóbe» men «Turan» (Túrkistan), «Astana» (Nur-Sultan) men «Qaırat» (Almaty) kezdesýleri bolady.
Al 24 mamyrda «Ordabasy» (Shymkent) men «Taraz», «Qyzyljar» (Petropavl) men «Atyraý», «Shahter» (Qaraǵandy) men «Tobyl» (Qostanaı), «Aqjaıyq» (Oral) men «Kaspıı» (Aqtaý) oıyndary ótkiziledi.