Fýtboldan Qazaqstan birinshiligi: «Jetisý» qatarynan úsh márte jeńiske jetti
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiliginiń on tórtinshi týrynyń alǵashqy oıyn kúni aıaqtaldy, dep habarlaıdy QazAqparat tilshisi.
Atalǵan týrdaǵy alǵashqy oıynda «Qyzyljar» (Petropavl) men «Taraz» komandalary sheberlik baıqasty. Kezdesýde 2:2 esebi tirkeldi.
Tarazdyq klýb sapynan Nenad Adamovıch 11, 37-mınýttarda mergendik tanytty.
Oǵan alań ıeleri qatarynan Darko Zorıch 64, Álibek Qasym 90-mınýttarda qos golmen jaýap berdi.
Almatylyq «Qaırat» pen Qyzylordanyń «Qaısar» arasyndaǵy kezdesý taǵdyryn 33-mınýtta almatylyq shabýylshy Hose Kante soqqan jalǵyz gol sheshti.
«Qaırat» qarsylasyn 1:0 esebimen jeńdi.
Túrkistanda jergilikti «Turan» Taldyqorǵannyń «Jetisý» komandasyna 0:2 esebimen jol berdi.
Taldyqorǵandyq klýbtan Nurbergen Nurbol 51-mınýtta mergendik tanytsa, 64-mınýtta Aıbar Jaqsylyqov penaltıdi múlt jibergen joq.
Osylaısha «Jetisý» qatarynan úshinshi márte jeńiske jetti.
Endi 29 mamyrda «Ordabasy» (Shymkent) men «Shahter» (Qaraǵandy), «Kaspıı» (Aqtaý) men «Astana» (Nur-Sultan), «Atyraý» men «Aqjaıyq» (Oral), «Tobyl» (Qostanaı) men «Aqtóbe» kezdesedi.
