Fýtboldan Qazaqstan birinshiligi: «Turan» qatarynan úshinshi márte jeńiske jetti
NUR-SULTAN. QazAqparat – Búgin fýtboldan Premer-lıga komandalary arasyndaǵy el birinshiliginiń on birinshi týryndaǵy alǵashqy oıyn aıaqtaldy, dep habarlaıdy QazAqparat tilshisi.
Alǵashqy oıynda elordada Qaraǵandynyń «Shahteri» men Túrkistannyń «Turan» komandalary kezdesti. Eki komanda da týrnır kestesinde tómengi oryndarda keledi. Degenmen túrkistandyq klýb sońǵy eki kezdesýde qatarynan jeńiske jetti. Sondyqtan olar búgin de sol jeńisti joldy jalǵastyrýǵa tyrysatyny belgili edi. Esesine «Shahter» keıingi tórt kezdesýde nebári bir márte jeńiske jetti.
Oıyn barysynda eki komandanyń da belsendiligi kórinip turdy. Birinshi kezeńniń 20-mınýtta qaraǵandylyq komanda qaqpasyna belgilengen penaltıden «Turan» shabýylshysy Tańat Nóserbaev múlt ketken joq. Budan keıin tablodaǵy esep ózgergen joq. Osylaısha «Turan» qatarynan úsh márte jeńiske jetip, týrnır kestesinde onynshy orynǵa kóterildi.
Sondaı-aq, búgin 16.00-de «Aqjaıyq» (Oral) pen «Qaırat» (Almaty) kezdesedi, Al 18.00-de «Aqtóbe» men «Qaısar» (Qyzylorda), 20.00-de «Astana» (Nur-Sultan) men «Jetisý» (Taldyqorǵan) sheberlik baıqasady.
Al 15 mamyrda saǵat 15.00-de «Qyzyljar» (Petropavl) men «Kaspıı» (Aqtaý) kezdesse, 17.00-de «Ordabasy» (Shymkent) men «Tobyl» (Qostanaı) komandalary sheberlik baıqasady. Atalǵan týrdy saǵat 19.00-de «Atyraý» jáne «Taraz» kezdesýi túıindeıdi. https://kaz.inform.kz/news/futboldan-kazakstan-birinshiligi-bugin-on-birinshi-tur-oyyndary-bastalady_a3787857
