Fýtboldan Qazaqstan birinshiligi: «Turan» qatarynan ekinshi márte jeńiske jetti
NUR-SULTAN. QazAqparat - Fýtboldan Premer-lıga komandalary arasyndaǵy el birinshiliginiń onynshy týry máresine jetti, dep habarlaıdy QazAqparat tilshisi.
Atalǵan týrdaǵy sońǵy oıynda Túrkistanda jergilikti «Turan» men Petropavldyń «Qyzyljar» komandasy kezdesti.
Oıyn barysynda eki komanda bir-biriniń qaqpasyna jıi shabýyldady. Degenmen qarsylastar bir-biriniń qaqpasynan sańylaý taba alǵan joq.
Kezdesý taǵdyryn sheshken gol 92-mınýtta soǵyldy. Sol ýaqytta «Qyzyljar» qaqpasyna belgilengen penaltıdi «Turan» fýtbolshysy Stefan Jıvkovıch múlt jibergen joq.
Osylaısha túrkistandyq klýb qarsylasynan 1:0 esebimen basym tústi. Nátıjesinde birinshilik barysynda qatarynan ekinshi márte jeńiske jetip otyr.
Atalǵan jeńisten keıin «Turan» 9 upaı jınap, 11-orynǵa kóterildi.
Aıta keteıik, atalǵan týrdaǵy tórt oıyn 8 mamyr kúni ótkizildi. Sol kúni óz alańynda Qyzylordanyń «Qaısary» Oraldyń «Aqjaıyǵynan», «Taraz» elordalyq «Astanadan» 0:1 esebimen jeńilip qaldy . Al Almatynyń «Qaıraty» Qaraǵandynyń «Shahterimen» 1:1, Aqtaýdyń «Kaspııi» Shymkenttiń «Ordabasy» klýbymen 0:0 esebimen teń tústi.
Sondaı-aq, búgin «Aqtóbe» syrt alańda Taldyqorǵannyń «Jetisýyn» 5:1 esebimen tize búktirdi .
Qostanaılyq «Tobyl» óz alańynda «Atyraýdan» 2:0 esebimen basym tústi .
Endi aldaǵy on birinshi týr oıyndary 15 mamyrda ótkiziledi.
Bul kúni «Aqjaıyq» pen «Qaırat», «Aqtóbe» men «Qaısar», «Astana» men «Jetisý», «Atyraý» men «Taraz», «Qyzyljar» men «Kaspıı», «Ordabasy» men «Tobyl», «Shahter» men «Turan» komandalary sheberlik baıqasady.
