Fýtboldan Qazaqstan birinshiligi: Tórt kezdesýde teń nátıje tirkeldi
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan birinshiligi birinshi týrynyń alǵashqy oıyn kúni aıaqtaldy, dep habarlaıdy QazAqparat tilshisi.
Alǵashqy týrdyń shymyldyǵyn ashqan «Ordabasy» (Shymkent) - «Maqtaral» (Túrkistan oblysy) komandalary arasyndaǵy oıynda 1:1 esebi tirkeldi.
Al «Astana» (Nur-Sultan) men «Shahter» (Qaraǵandy), «Atyraý» men «Aqsý» (Pavlodar oblysy), «Turan» (Túrkistan) men «Taraz» oıyndarynda komandalar 0:0 esebine qanaǵat bildirdi.
Sondaı-aq, «Kaspıı» (Aqtaý) men «Qyzyljar» (Petropavl) kezdesýinde aqtaýlyq klýb 1:0 esebimen basym tústi.
Al 6 naýryzda qalǵan eki oıyn bolady. Aldymen 15.00-de «Qaırat» (Almaty) men «Aqtóbe», 17.00-de «Tobyl» (Qostanaı) men «Aqjaıyq» (Oral) komandalary oınaıdy. Bul kúngi eki oıyn da «Qazsport» telearnasynan tikeleı efırde kórsetiledi.
Eske salsaq, bıylǵy dop dodasynda barlyǵy 14 komanda baq synaıdy. Olar eki aınalym júıesi boıynsha sheberlik baıqasady.
