Fýtboldan Qazaqstan birinshiligi: «Tobyl» jetinshi jeńisine qol jetkizdi
NUR-SULTAN. QazAqparat - Fýtboldan Premer-lıga komandalary arasyndaǵy el birinshiliginiń on ekinshi týry máresine jetti, dep habarlaıdy QazAqparat tilshisi.
Sońǵy eki kezdesýdiń birinde Qostanaıda «Tobyl» Petropavldyń «Qyzyljaryn» qabyldady. Alań ıeleri qarsylastar qaqpasyna jıi shabýyldady. Osyndaı sátterdiń birinde qostanaılyq Nemanıa Nıkolıch 63-mınýtta mergendik tanytsa, 77-mınýtta Serikjan Mýjıkov penaltıden múlt ketken joq. Osylaısha «Tobyl» qarsylasynan 2:0 esebimen basym tústi.
Al «Atyraý» óz alańynda Shymkenttiń «Ordabasy» klýbyn qabyldady. Atalǵan kezdesýde komandalar bir-biriniń qaqpasynan sańylaý taba alǵan joq. Nátıjesinde komandalar 0:0 esebine qanaǵat bildirdi.
Búgin, 19 mamyrda Aqtaýdyń «Kaspıı» komandasy óz alańynda Qaraǵandynyń «Shahterin» 3:0 esebimen súrindirse, «Taraz» óz alańynda kósh sońynda kele jatqan Taldyqorǵannyń «Jetisýyna» 2:3 esebimen jol berdi.
Al keshe, 18 mamyrda Oraldyń «Aqjaıyǵy» Túrkistanda «Turandy» 2:0, elordalyq «Astana» Qyzylordada «Qaısardy» 5:2 esebimen jeńdi. Al Almatyda «Qaırat» «Aqtóbeni» 4:2 esebimen tize búktirdi.
Atalǵan týrdan keıin 32 upaımen «Astana» kósh bastap tur. Odan keıingi oryndardaǵy «Tobyldyń» 25, «Aqjaıyqtyń» 21 upaıy bar.
Endi aldaǵy on úshinshi týr oıyndary 23 jáne 24 mamyr kúnderi ótkiziledi.
