Fýtboldan Qazaqstan birinshiligi: «Tobyl» «Tarazdy» iri eseppen jeńdi
NUR-SULTAN. QazAqparat - Fýtboldan Premer-lıga komandalary arasyndaǵy el birinshiligi toǵyzynshy týrynyń alǵashqy oıyn kúni máresine jetti, dep habarlaıdy QazAqparat tilshisi.
Úshinshi kezdesýde «Tobyl» komandasy Qostanaıda «Tarazdy» qabyldady. Eki klýb ta týrnır kestesinde aldyńǵy oryndarda keledi. Sondyqtan jankúıerler kezdesýdiń tartysty ótýinen úmit kútti.
Ótken týrda oılamaǵan jerden Aqtaýda «Kaspııge» jol bergen qostanaılyq klýb sol olqylyqtyń ornyn toltyrýǵa tyrysty. Oıyn basynan tizgindi qolda ustaýǵa tyrysqan alań ıeleri birinshi kezeńde qarsylastar qaqpasyna eki gol soǵyp úlgerdi. Ony 30-ynshy, 42-mınýttarda Nemanıa Nıkolıch óz enshisine jazdy.
Ekinshi kezeńde «Tobyl» sapynan Rýslan Valıýllın 82-mınýtta mergendik tanytty.
Oıynda alań ıeleri 3:0 esebimen jeńiske jetip, týrnır kestesinde 15 upaımen ekinshi orynǵa kóterildi. Kósh basynda 23 upaımen «Astana» komandasy tur. Búgingi jeńilisten keıin «Taraz» 17 upaımen úshinshi orynǵa tómendedi.
Esterińizge sala ketelik, budan buryn elordalyq «Astana» syrt alańda «Aqtóbeden» 2:0 esebimen basym túsken bolatyn.
Odan keıin «Atyraý» óz alańynda Aqtaýdyń «Kaspııin» 2:1 esebimen tize búktirdi.
Endi 3 mamyrda «Qyzyljar» (Petropavl) men «Qaırat» (Almaty), «Ordabasy» (Shymkent) men «Turan» (Túrkistan), «Aqjaıyq» (Oral) pen «Jetisý» (Taldyqorǵan), «Shahter» (Qaraǵandy) men «Qaısar» (Qyzylorda) sheberlik baıqasady.
