Fýtboldan Qazaqstan birinshiligi: «Tobyl» qaıtadan kósh basyna shyqty
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiliginiń 19-týrynda ekinshi oıyn kúni aıaqtaldy, dep habarlaıdy QazAqparat tilshisi.
Búgingi alǵashqy kezdesýde Taldyqorǵanda jergilikti «Jetisý» óz alańynda Petropavldyń «Qyzyljar» komandasyn qabyldady. Atalǵan oıynda 0:0 esebi tirkeldi. Taldyqorǵandyq klýb bir upaı ǵana oljalap, týrnır kestesinde sońǵy orynda tur.
Taǵy bir kezdesý Túrkistanda «Turan» men Qostanaıdyń «Tobyl» komandalary arasynda ótti. Match alań ıeleri úshin sátti bastalǵan edi. Birinshi kezeńniń 16-mınýtynda túrkistandyq Temirlan Ámirov mergendik tanytsa, 33-mınýtta onyń komandalas áriptesi Oljas Kerimjanov óziniń qaqpasyna gol soǵyp aldy. Al 56-mınýtta qostanaılyq klýbtan Tonı Sılva penaltıdi múltiksiz oryndasa, 76-mınýtta Temirlan Ámirov tarazy basyn teńestirdi. Odan keıin «Tobyl» sapynan Sergeı Malyı – 84, Elgýdja Lobjanıdze 87-mınýttarda gol soǵyp, qorytyndy esepti belgiledi. Oıynda qostanaılyq klýb 4:2 esebimen jeńip, týrnır kestesinde kósh basyna qaıta shyqty.
Ekinshi oıyn kúnin Qyzylordada «Qaısar» men Shymkenttiń «Ordabasy» klýbtary túıindedi. Kezdesý barysynda Maqsat Baıjanov 42-mınýtta qarsylastar qaqpashysyn qapy qaldyrdy. Osylaısha alań ıeleri qarsylasyn 1:0 esebimen tize búktirdi.
Aıta ketsek, atalǵan týrda úsh oıyn ótkizilip, «Qaırat» «Atyraýdy» 5:0, «Astana» «Shahterdi» 4:3, «Aqtóbe» «Aqjaıyqty» 2:1 esebimen jeńdi.
Atalǵan týrdy 4 shildede saǵat 19.00-de «Taraz» ben «Kaspıı» (Aqtaý) kezdesýi túıindeıdi.
