Fýtboldan Qazaqstan birinshiligi: «Tobyl» «Atyraýdan» basym tústi
NUR-SULTAN. QazAqparat - Fýtboldan Premer-lıga komandalary arasyndaǵy el birinshiliginiń onynshy týrynda taǵy bir oıyn máresine jetti, dep habarlaıdy QazAqparat tilshisi.
Atalǵan týrdaǵy altynshy jupta Qostanaıda jergilikti «Tobyl» «Atyraýmen» sheberlik baıqasty. Qostanaılyq klýb bıyl da týrnır kestesinde úzdikter qatarynda kórinip keledi. Al «Atyraý» ala-qula oıynymen kózge túsip júr.
Oıyn barysynda eki komanda da teń dárejede sheberlik kórsetti. Ekeýi de esep ashatyn birneshe múmkindikti múlt jiberdi. Degenmen 80-mınýtta qostanaılyq Serikjan Mýjıkov qaqpany dál kózdedi. Oıynnyń 92-mınýtynda onyń komandalas áriptesi Jeremı Manzorro qorytyndy esepti belgiledi. Osylaısha «Tobyl» qarsylasynan 2:0 esebimen basym tústi.
Atalǵan jeńisten keıin «Tobyl» 21 upaımen ekinshi orynǵa jaıǵasty. Kósh basynda 26 upaımen «Astana» komandasy tur.
Aıta keteıik, atalǵan týrdaǵy tórt oıyn 8 mamyr kúni ótkizildi. Sol kúni óz alańynda Qyzylordanyń «Qaısary» Oraldyń «Aqjaıyǵynan», «Taraz» elordalyq «Astanadan» 0:1 esebimen jeńilip qaldy .
Al Almatynyń «Qaıraty» Qaraǵandynyń «Shahterimen» 1:1, Aqtaýdyń «Kaspııi» Shymkenttiń «Ordabasy» klýbymen 0:0 esebimen teń tústi.
Sondaı-aq, búgin «Aqtóbe» syrt alańda Taldyqorǵannyń «Jetisýyn» 5:1 esebimen tize búktirdi .
