Fýtboldan Qazaqstan birinshiligi: «Ordabasy» óz alańynda «Turanǵa» ese jiberdi
NUR-SULTAN. QazAqparat - Fýtboldan Premer-lıga komandalary arasyndaǵy el birinshiliginiń toǵyzynshy týrynda Shymkenttiń «Ordabasy» klýby Túrkistannyń «Turanymen» kezdesti, dep habarlaıdy QazAqparat tilshisi.
Ońtústik ólkeniń qos komandasy arasyndaǵy kezdesýde basty favorıt retinde shymkenttik klýb atalǵan bolatyn. Óıtkeni, Premer-lıgaǵa bıyl ǵana qosylǵan túrkistandyq klýb óz oıynyn taba alar emes. Nátıjesinde týrnır kestesinde sońǵy orynnyń birinde turdy.
Búgingi kezdesýge «Turan» tas-túıin daıyn shyqqan sekildi. Azýly qarsylasynan qaımyqqan joq. Oıynnyń 30-mınýtynda túrkistandyq fýtbolshy Temirlan Ámirov alań ıeleriniń qaqpasyn dál kózdedi.
Búgingi kezdesýde «Ordabasy» qarsylasynan 0:1 esebimen basym tústi. Osylaısha «Turan» alǵashqy jeńisine qol jetkizdi.
Keshe «Astana» syrt alańda «Aqtóbeni» 2:0 esebimen súrindirgen bolatyn.
Odan keıin «Atyraý» óz alańynda Aqtaýdyń «Kaspııin» 2:1 esebimen tize búktirdi.
Úshinshi kezdesýde «Tobyl» «Tarazdy» 3:0 esebimen jeńdi.
Al búgin Almatynyń «Qaıraty» Petropavlda «Qyzyljarmen» 1:1 esebine qanaǵat bildirdi.
Dál qazir aıaqtalǵan taǵy bir kezdesýde Oraldyń «Aqjaıyǵy» óz alańynda Taldyqorǵannyń «Jetisýynan» 3:2 esebimen basym tústi.
Endi taǵy bir oıynda «Shahter» (Qaraǵandy) men «Qaısar» (Qyzylorda) komandalary sheberlik baıqasady.
