Fýtboldan Qazaqstan birinshiligi: «Ordabasy» men «Tobyl» teń tústi
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiliginiń on birinshi týry máresine jetti, dep habarlaıdy QazAqparat tilshisi.
Shymkenttiń «Ordabasy» klýby óz alańynda Qostanaıdyń «Tobylymen» sheberlik baıqasty. Eki komanda týrnır kestesinde jylma-jyl úzdikter qatarynan kórinip keledi. Sondyqtan búgin jankúıerler olardan tartysty oıyn kútkeni anyq.
Kezdesý barysynda «Tobyl» sapynan Samat Jarynbetov 67-mınýtta esep ashqan edi. Oǵan 87-mınýtta shymkenttik Erkebulan Tuńǵyshbaev tarazy basyn teńestirip ketti. Osylaısha oıyn 1:1 esebimen teń aıaqtaldy.
Al «Atyraý» óz alańynda «Taraz» komandasymen kezdesti. Kezdesý taǵdyryn 49-mınýtta alań ıeleri sapynan Brýno Alves soqqan jalǵyz gol sheshti. Osylaısha alań ıeleri qarsylasyn 1:0 esebimen tize búktirdi.
Esterińizge sala ketelik, buǵan deıin atalǵan týrdyń alǵashqy oıyn kúninde tórt match ótkizildi. «Turan» syrt alańda qaraǵandylyq «Shahterdi», odan keıin óz alańynda Oraldyń «Aqjaıyǵy» Almatynyń «Qaıratyn», elordalyq «Astana» Taldyqorǵannyń «Jetisýyn» 1:0 esebimen jeńdi.
Al «Aqtóbe» men «Qaısar» 1:1 esebimen teń tússe, Petropavldyń «Qyzyljary» óz alańynda Aqtaýdyń «Kaspııinen» 2:0 esebimen basym tústi.
Endi on ekinshi týr oıyndary 18 jáne 19 mamyr kúnderi ótkiziledi.
