Fýtboldan Qazaqstan birinshiligi maýsym aıynda qaıta jalǵasyp, jankúıersiz ótkizilýi múmkin
NUR-SULTAN. QazAqparat - Fýtboldan Qazaqstan birinshiligi maýsym aıynyń basynda qaıta jalǵasyp, jankúıersiz ótkizilýi múmkin. Bul másele Qazaqstan kásipqoı fýtbol lıgasy men otandyq fýtbol klýbtary basshylarynyń vıdeokonferentsııasynda talqylandy, dep habarlaıdy QazAqparat tilshisi.
Atalǵan vıdeokonferentsııany Qazaqstan kásipqoı fýtbol lıgasynyń basshysy Oljas Abraev júrgizdi. Qazaqstan fýtbol federatsııasy men Qazaqstan kásipqoı fýtbol lıgasy qaýipti indetke sáıkes másele túıinin sheshýdiń joldaryn qarastyryp keledi. Fýtbolshylardyń jattyǵý jáne oıyn alańyna oralýyna qajetti is-sharalar keshenin júzege asatyn bolady. Bul baǵytta tótenshe jaǵdaı rejımin qamtamasyz etý jónindegi memlekettik komıssııamen tıisti sheshimder qabyldanady. Sondaı-aq, atalmysh maqsatta aımaqtyq tótenshe jaǵdaılar qarsy jedel shtabtardyń pikirleri eskeriledi. Sol boıynsha burynǵydaı tártippen ashyq aspan astynda jattyǵý júrgizý joly qarastyrylady.
Qazaqstan kásipqoı fýtbol lıgasy 2020 jylǵy OLIMPBET-Qazaqstan birinshiligin qarasha aıyna deıin aıaqtaý maqsatynda oıyndar sanyn qysqartýdy usynyp otyr. Bul jaǵdaıda qazirge deıin ótken 1 jáne 2 týr, merzimi ózgergen oıyndardy qosa eseptegende birinshilik eki aınalym boıynsha júrgiziledi. Atalǵan tizbe negizinde qolaıly epıdemıologııalyq jaǵdaıda birinshilik maýsym aıynyń basynda jankúıerler qatysýynsyz qaıta jalǵasýy múmkin. Ol boıynsha oıyndar kúntizbesinen úshinshi aınalym qysqartylady jáne týrlardyń ótkizý merzim jańartylady.
Sondaı-aq, qolaıly jaǵdaıda birinshi lıga klýbtary arasyndaǵy birinshilikti maýsym aıynda bastaý josparlanyp otyr. Qazaqstan kásipqoı fýtbol lıgasynyń ákimshiligi týrnırdi eki aınalym boıynsha ótkizý máselesin usynady. Bul boıynsha komandalar eki aptada úsh oıyn ótkizedi. Nátıjesinde birinshilik oıyndaryn qazan aıyna deıin aıaqtaý oılastyrylǵan.
Al ekinshi lıga komandalary birinshiligi tómendegi júıe boıynsha júrgizilýi kútilýde. Bıyl týrnırge 22 komanda qatysady dep josparlanǵan. Lıga ákimshiligi birinshilik oıyndaryn «Ońtústik-Batys» jáne «Soltústik-Shyǵys» eki konferentsııasy boıynsha júrgizý jobayn qarastyrady. Árbir konferentsııaǵa 11 komandadan toptastyrylady. Bul jaǵdaıda birinshilik 22 qyrkúıekte aıaqtalady. Birinshi lıgaǵa árbir konferentsııanyń jeńimpazdary joldama alady.
Oıyn kúntizbesiniń tyǵyzdyǵyna oraı Qazaqstan kýbogy oıyndaryn ótkizýge ózgeris engiziledi. Jarystyń árbir satysynda jup qurǵan komandalar jeńimpazy bir oıyn arqyly anyqtalady. Eýrokýbok oıyndaryna qatysatyn «Astana», «Qaırat», «Ordabasy» men «Qaısar» komandalaryna birdeı múmkindik jasaý maqsatynda olar birden 1/4 fınaldyq oıyndarǵa qatysýǵa múmkindik alady. Fınal 2 qarashaǵa josparlanyp otyr.
Buǵan deıin fýtboldan Qazaqstan birinshiligi qashan jalǵasatyny belgili boldy.
