Fýtboldan Qazaqstan birinshiligi: «Qaırat» pen «Tobyl» teń tústi
NUR-SULTAN. QazAqparat - Búgin, 19 cáýirde fýtboldan Premer-lıga komandalary arasyndaǵy el birinshiliginiń altynshy týry máresine jetti, dep habarlaıdy QazAqparat tilshisi.
Atalǵan týrdyń ekinshi kúninde tórt oıyn ótkizildi. Alǵashqy oıynda Taldyqorǵannyń «Jetisýy» óz alańynda Shymkenttiń «Ordabasy» klýbyna 0:4 esebimen jol berdi. Oıyn barysynda shymkenttik komandadan Aleksandr Sımchevıch 27, Elhan Astanov 57, Joao Paolo 60, Mırzad Mehanovıch 94-mınýttarda gol soqty.
Syrt alańda Qaraǵandynyń «Shahteri» «Aqtóbeni» 3:0 esebimen tas-talqan etip jeńdi. Bul joly qaraǵandylyq klýb sapynan Arsen Hýbýlov 5, 23, Aıdos Táttibaev 73-mınýttarda mergendik tanytty.
Túrkistanda «Turan» Aqtaýdyń «Kaspıı» klýbymen 2:2 esebimen teń tústi. Oıyn barysynda alań ıeleri qatarynan Nkobı Chısom Stenlı 60, 67-mınýttarda gol soqsa, «Kaspıı» sapynan Arman Núsip 31, Davıd Karaev 84-mınýttarda qaqpany dál kózdedi.
Dál osyndaı esep Almaty qalasynda «Qaırat» pen Qostanaıdyń «Tobyl» komandalary arasynda tirkeldi. Alań ıelerinen Hose Kante 20, 67-mınýttarda qos goldyń avtory atandy. Oǵan qostanaılyq klýbtan Azat Nurǵalıev 3, Nemanıa Nıkolıch 70-mınýttarda kózdegen nysanadan múlt ketken joq.
Esterińizge sala ketelik, 18 sáýirde óz alańynda «Astana» «Qyzyljardy» 3:1, «Taraz» «Aqjaıyqty» 1:0 esebimen jeńdi. Al «Qaısar» men «Atyraý» oıynynda 1:1 esebi tirkeldi.
Jetinshi týr oıyndary 23 jáne 24 sáýir kúnderi ótkiziledi.
