Fýtboldan Qazaqstan birinshiligi qashan jalǵasatyny belgili boldy
NUR-SULTAN. QazAqparat - Fýtboldan barlyq deńgeıdegi Qazaqstan birinshiliginiń qashan jalǵasatyny belgili boldy, dep habarlaıdy QazAqparat Qazaqstan fýtbol federatsııasynyń saıtyna silteme jasap.
Bul sheshim Qazaqstan fýtbol federatsııasy men Kásipqoı fýtbol lıgasy basshylarynyń birikken jıynynda qabyldandy. Oǵan QFF bas hatshysy Azamat Aıthojın, KFL prezıdenti Oljas Abraev, departament jetekshileri qatysty.
Qazaqstanda kásipqoı jáne áýesqoı komandalary arasyndaǵy el birinshiligi, fýtbol, fýtzal jáne jaǵajaı fýtbolynan kýbok týrnırleri elimizde tótenshe jaǵdaı rejımi aıaqtalǵannan keıin qaıtadan jalǵasatyn bolady.
El birinshiligin jalǵastyrýdyń eki nusqasy qarastyryldy. Negizgi nusqasy retinde birinshilikti eki aınalym boıynsha ótkizý oılastyryldy. Qosymsha nusqasy retinde bıylǵy dop dodasyn «kúz-kóktem» júıesi boıynsha uıymdastyrý josparlanǵan. Qazaqstan kýbogy, birinshi jáne ekinshi lıgada komandalary arasyndaǵy birinshilikterdi ótkizý osyndaı nusqalar boıynsha júrgiziledi.
Esterińizge sala ketelik, fýtboldan Premer-lıga komandalary arasyndaǵy el birinshiligin ótkizý eki týrdan keıin belgisiz merzimge keıin shegerilgen bolatyn.
