Fýtboldan Qazaqstan birinshiligi: Búgin toǵyzynshy týr oıyndary bastalady
NUR-SULTAN. QazAqparat – Búgin fýtboldan Premer-lıga komandalary arasyndaǵy el birinshiliginiń toǵyzynshy týry bastalady, dep habarlaıdy QazAqparat tilshisi.
Oıyndar 2 jáne 3 mamyr kúnderine belgilengen. Alǵashqy kúni úsh jup kezdesse, ekinshi kúninde tórt match ótedi.
Atalǵan týrdyń shymyldyǵy 2 mamyrda elorda ýaqytymen 17.00- de «Aqtóbe» men «Astana» (Nur-Sultan) komandalary kezdesýimen ashylady. Odan keıin 18.00-de «Atyraý» men «Kaspıı» (Aqtaý), 19.00-de «Tobyl» (Qostanaı) men «Taraz» oıyndarymen jalǵasady.
Al 3 mamyrda 16.00 «Qyzyljar» (Petropavl) men «Qaırat» (Almaty) kezdesse, 18.00-de «Ordabasy» (Shymkent) men «Turan» (Túrkistan), «Aqjaıyq» (Oral) pen «Jetisý» (Taldyqorǵan) komandalary sheberlik baıqasady. Atalǵan týrdy 20.00-de «Shahter» (Qaraǵandy) men «Qaısar» (Qyzylorda) kezdesýi túıindeıdi.
Esterińizge sala ketelik, segiz týrdan keıin «Astana» 20 upaımen kósh bastasa, odan keıingi oryndardaǵy «Tarazdyń» 17, «Qaırattyń» 15 upaıy bar.
