Fýtboldan Qazaqstan birinshiligi: Búgin on úshinshi týr oıyndary bastalady
NUR-SULTAN. QazAqparat – Búgin fýtboldan Premer-lıga komandalary arasyndaǵy el birinshiliginiń on úshinshi týry bastalady, dep habarlaıdy QazAqparat tilshisi.
Oıyndar 23 jáne 24 mamyr kúnderine belgilengen. Alǵashqy kúni úsh jup kezdesse, ekinshi kúninde tórt match ótedi.
Atalǵan týrdyń shymyldyǵy 23 mamyrda elorda ýaqytymen 17.00-de «Jetisý» (Taldyqorǵan) men «Qaısar» (Qyzylorda) komandalary kezdesýimen ashylady. Odan keıin 21.00-de «Aqtóbe» men «Turan» (Túrkistan), «Astana» (Nur-Sultan) men «Qaırat» (Almaty) kezdesýlerimen jalǵasady.
Al 24 mamyrda 18.00-de «Ordabasy» (Shymkent) men «Taraz», «Qyzyljar» (Petropavl) men «Atyraý» bolady. Atalǵan týrdy 20.00-de «Shahter» (Qaraǵandy) men «Tobyl» (Qostanaı), «Aqjaıyq» (Oral) men «Kaspıı» (Aqtaý) oıyndary túıindeıdi.
On eki týrdan keıin týrnır kestesinde 32 upaımen «Astana» komandasy kósh bastap keledi. Odan keıingi oryndardaǵy «Tobyldyń» 25, «Aqjaıyqtyń» 21 upaıy bar.
