Fýtboldan Qazaqstan birinshiligi: Búgin on birinshi týr oıyndary bastalady
NUR-SULTAN. QazAqparat – Búgin fýtboldan Premer-lıga komandalary arasyndaǵy el birinshiliginiń on birinshi týry bastalady, dep habarlaıdy QazAqparat tilshisi.
Oıyndar 14 jáne 15 mamyr kúnderine belgilengen. Alǵashqy kúni tórt jup kezdesse, ekinshi kúninde úsh match ótedi.
Atalǵan týrdyń shymyldyǵy 14 mamyrda elorda ýaqytymen 14.00-de «Shahter» (Qaraǵandy) men «Turan» (Túrkistan) komandalary kezdesýimen ashylady. Odan keıin 16.00-de «Aqjaıyq» (Oral) pen «Qaırat» (Almaty), 18.00-de «Aqtóbe» men «Qaısar» (Qyzylorda), 20.00-de «Astana» (Nur-Sultan) men «Jetisý» (Taldyqorǵan) oıyndarymen jalǵasady.
Al 15 mamyrda 15.00-de «Qyzyljar» (Petropavl) men «Kaspıı» (Aqtaý) kezdesse, 17.00-de «Ordabasy» (Shymkent) men «Tobyl» (Qostanaı) komandalary sheberlik baıqasady. Atalǵan týrdy 19.00-de «Atyraý» jáne «Taraz» kezdesýi túıindeıdi.
Onynshy týrdan keıin týrnır kestesinde 26 upaımen «Astana» kósh bastap keledi. Odan keıingi oryndardaǵy «Tobyldyń» 21, «Tarazdyń» 17 upaıy bar.
