Fýtboldan Qazaqstan birinshiligi: «Atyraý» tórt oıyn boıy jeńilmeı keledi
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiliginiń on tórtinshi týry máresine jetti, dep habarlaıdy QazAqparat tilshisi.
Atalǵan týrdaǵy sońǵy eki oıynnyń birinde «Atyraý» óz alańynda Oraldyń «Aqjaıyq» klýbynan 2:1 esebimen basym tústi. Kezdesý barysynda alań ıeleri qatarynan Alekseı Rodıonov 46, Sılva Garsııa Braıan 58-mınýtta mergendik tanytty. Osylaısha «Atyraý» tórt oıyn qatarynan jeńilmeı keledi. Onyń úsheýinde qarsylastaryn qapy qaldyryp ketti.
Al Qostanaıdyń «Tobyly» óz alańynda «Aqtóbeni» 2:1 esebimen jeńdi. Oıynda qostanaılyq Azat Nurǵalıev 17-mınýtta penaltıden múlt ketpese, 29-mınýtta Dmıtrıı Mıroshnıchenko esepti ústemeleı tústi. Al 87-mınýtta oǵan aqtóbelik Boıan Dýbaııch bir golmen jaýap qaıyrdy.
Eske salsaq, búgin atalǵan týrda budan buryn taǵy eki kezdesý ótkizildi. «Kaspıı» men «Astana» 2:2, «Ordabasy» men «Shahter» 0:0 esebimen teń tústi.
Sondaı-aq, keshe, 28 mamyrda atalǵan týrda úsh match ótkizildi. «Qyzyljar» men «Taraz» kezdesýinde 2:2 esebi tirkelse, «Qaırat» óz alańynda «Qaısardy» 1:0 esebimen jeńdi. Al óz alańynda Túrkistannyń «Turany» Taldyqorǵannyń «Jetisýyna» 0:2 esebimen jol berdi.
Endi on besinshi týr oıyndary 12 jáne 13 maýsym kúnderi ótkiziledi.
