Fýtboldan Qazaqstan birinshiligi: «Atyraý» «Kaspııden» basym tústi
NUR-SULTAN. QazAqparat - Fýtboldan Premer-lıga komandalary arasyndaǵy el birinshiligi toǵyzynshy týrynyń taǵy bir oıyny aıaqtaldy, dep habarlaıdy QazAqparat tilshisi.
Bul joly «Atyraý» óz alańynda Aqtaýdyń «Kaspıı» komandasyn qabyldady. Elimizdiń batys óńirindegi qos komanda arasyndaǵy jekpe-jek tartysty ótti.
Alań ıeleri sapynan 16-mınýtta Garsııa Braıan Sılva esep ashty. Al 19-mınýtta onyń komandalas áriptesi Aleks Brýnov esepti ulǵaıtty.
Oıynnyń 40-mınýtynda «Kaspıı» sapynan Davıd Karaev penaltıden múlt ketpedi. Budan keıin tablodaǵy esepke ózgeris engen joq. Osylaısha «Atyraý» qarsylasyn 2:1 esebimen tize búktirdi. Qatarynan úsh oıyn boıy jeńiske jetip, nátıjesinde 11 upaımen segizinshi orynǵa kóterildi.
Esterińizge sala ketelik, buǵan deıin elordalyq «Astana» syrt alańda «Aqtóbeden» 2:0 esebimen basym túsken bolatyn.
Dál qazir «Tobyl» (Qostanaı) men «Taraz» kezdesýiniń birinshi kezeńinen keıin alań ıeleri 2:0 esebimen jeńip jatyr.
Endi 3 mamyrda «Qyzyljar» (Petropavl) men «Qaırat» (Almaty), «Ordabasy» (Shymkent) men «Turan» (Túrkistan), «Aqjaıyq» (Oral) pen «Jetisý» (Taldyqorǵan), «Shahter» (Qaraǵandy) men «Qaısar» (Qyzylorda) sheberlik baıqasady.
