Fýtboldan Qazaqstan birinshiligi: «Atyraý» altynshy orynǵa kóterildi
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiliginiń 13-týrynyń taǵy eki oıyny aıaqtaldy, dep habarlaıdy QazAqparat tilshisi.
Atalǵan týrdaǵy ekinshi oıyn kúnindegi bir kezdesý Shymkentte jergilikti «Ordabasy» men «Taraz» arasynda ótkizildi. Ońtústik ólkeniń qos komandasy arasyndaǵy jekpe-jekte 1:1 esebi tirkeldi. Oıyn barysynda «Taraz» sapynan Eldos Ahmetovtiń 77-mınýtynda soqqan golyna 82-mınýtta shymkenttik Erkebulan Tuńǵyshbaev bir doppen jaýap qaıyrdy.
Al Petropavlda jergilikti «Qyzyljar» «Atyraýǵa» 0:1 esebimen jol berdi. Kezdesý taǵdyryn 86-mınýtta atyraýlyq Vıktor Dmıtrıenko soqqan jalǵyz gol sheshti. Osylaısha atyraýlyqtar týrnır kestesinde altynshy orynǵa kóterildi.
Atalǵan týrdaǵy úsh oıyn keshe, 23 mamyrda ótkizildi. Alǵashqy oıynda «Jetisý» «Qaısardan» 2:0 esebimen basym tússe, «Turan» syrt alańda «Aqtóbeni» 1:0 esebimen tize búktirdi. Al «Astana» men «Qaırat» arasyndaǵy kezdesý 1:1 esebimen aıaqtaldy.
Endi búgin taǵy eki kezdesý ótkizilip, «Shahter» (Qaraǵandy) men «Tobyl» (Qostanaı), «Aqjaıyq» (Oral) men «Kaspıı» (Aqtaý) oıyndary bolady.
