Fýtboldan Qazaqstan birinshiligi: «Astana» men «Qaırat» qarsylastaryn iri eseppen jeńdi
NUR-SULTAN. QazAqparat – Fýtboldan Premer-lıga komandalary arasyndaǵy el birinshiliginiń on ekinshi týryndaǵy alǵashqy oıyn kúni aıaqtaldy, dep habarlaıdy QazAqparat tilshisi.
Budan buryn Oraldyń «Aqjaıyǵy» Túrkistanda «Turandy» 2:0 esebimen jeńgenin habarlaǵan edik.
Ekinshi kezdesýde Almatyda «Qaırat» «Aqtóbeni» 4:2 esebimen tize búktirdi. Oıyn barysynda almatylyq klýb sapynan Artýr Shýshenachev 7, 36, Hose Kante 50, Neboısha Kosovıch 86-mınýttarda gol soqsa, oǵan «Aqtóbe» quramynan Dıdar Jalmuqan 41, Erveın Mýkam 53-mınýttarda eki golmen jaýap qaıyrdy. Osylaısha «Qaırat» úsh oıynǵa sozylǵan sátsizdik serııasyn toqtatty.
Elordalyq «Astana» Qyzylordada «Qaısardy» 5:2 esebimen oısyrata jeńdi. Kezdesýde elordalyq komandadan Marın Tomasov 31, 61, Varazdat Aroıan 36, Maks Ebong 46, Roman Mýrtazaev 47-mınýttarda mergendik tanytty. Al alań ıeleri qatarynan Egor Potapov 43, Stefan Denkovıch 87-mınýttarda gol soqty.
Ázirge týrnır kestesinde «Astana» 32 upaımen kósh bastap tur. Odan keıingi oryndardaǵy «Tobyldyń» 22, «Aqjaıyǵy» 21 upaıy bar.
Endi 15 mamyrda 18.00-de «Kaspıı» (Aqtaý) men «Shahter» (Qaraǵandy), «Taraz» ben «Jetisý» (Taldyqorǵan) komandalary jasyl alańǵa shyǵady. Atalǵan týrdy 20.00-de «Atyraý» men «Ordabasy», «Tobyl» (Qostanaı) men «Qyzyljar» (Petropavl) kezdesýleri túıindeıdi.
