Fýtboldan Qazaqstan birinshiligi: «Astana» qaıtadan kósh bastady
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiliginiń 19-týrynda eki oıyn ótkizildi, dep habarlaıdy QazAqparat tilshisi.
Atalǵan týrdyń shymyldyǵy elordalyq «Astana» men Qaraǵandynyń «Shahter», Almatynyń «Qaırat» jáne «Atyraý» komandalary kezdesýlerimen túrildi. Qatar ótken eki oıyn da goldardyń kóp soǵylýymen erekshelendi.
«Astana» men «Shahter» kezdesýi tartysqa toly boldy. Eki komanda barlyǵy jeti gol soǵyp ketti. Aldymen elordalyq klýbtan Maks Ebong 6, Valerıı Chýperka 26-mınýttarda mergendigimen kózge tústi. Budan keıin qaraǵandylyq komandadan Ivan Svırıdov 41-mınýtta esep aıyrmasyn qysqartty. Elordalyq Abat Aıymbetov 55-mınýtta gol soqsa, qaraǵandylyq Gevorg Nadjarıan 63-mınýtta kózge tústi. «Astana» sapynan Tıgran Barsegıan 77-mınýtta qaqpany dál kózdese, oǵan qaraǵandylyq Eskendir Qybyraı 78-mınýtta bir golmen jaýap qaıyrdy.
Osylaısha «Astana» qarsylasyn 4:3 esebimen tize búktirip, týrnır kestesinde 41 upaımen qaıtadan kósh basyna shyqty.
Al almatylyq «Qaırat» óz alańynda «Atyraýdy» 5:0 esebimen tize búktirdi. Oıyn barysynda almatylyq Artýr Shýshenachev 29, 60-mınýttarda qos goldyń avtory atandy. Al Hose Konte 57, Gýljıgıt Alyqulov 69, Kamo Oganesıan 93-mınýttarda esep aıyrmasyn ulǵaıtty.
Eske salsaq, búgin atalǵan týrda taǵy bir kezdesý ótkizilýde. «Aqtóbe» óz alańynda «Aqjaıyq» (Oral) komandasyn qabyldaýda.
Endi 3 shildede saǵat 18.00-de «Jetisý» (Taldyqorǵan) men «Qyzyljar» (Petropavl), 21.00-de «Qaısar» (Qyzylorda) men «Ordabasy» (Shymkent), 20.00-de «Turan» (Túrkistan) men «Tobyl» (Qostanaı) oıyndary ótkiziledi.
Atalǵan týrdy 4 shildede saǵat 19.00-de «Taraz» ben «Kaspıı» (Aqtaý) kezdesýdi túıindeıdi.
