Fýtboldan Qazaqstan birinshiligi: «Astana» qatarynan segizinshi ret jeńiske jetti
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiligi on birinshi týrynyń alǵashqy oıyn kúni aıaqtaldy, dep habarlaıdy QazAqparat tilshisi.
Búginge belgilengen kezdesýler elordalyq «Astana» men Taldyqorǵannyń «Jetisý» jubynyń oıynymen máresine jetti. Týrnır kestesinde alǵashqy jáne sońǵy orynda turǵan komandalar kezdesýin jankúıerler asyǵa kútken anyq.
Oıyn taǵdyryn jalǵyz gol sheshti. Ony 4-mınýtta elordalyq fýtbolshy Marın Tomasov óziniń enshisine jazdy. Budan keıin esepti ózgertetin birneshe múmkindik bolǵan edi. Oıyn sońyna deıin tablodaǵy esep ózgergen joq. Osylaısha «Astana» qarsylasyn 1:0 esebimen tize búktirdi. Elordalyq klýb qatarynan segizinshi márte jeńiske jetip otyr.
Búgingi jeńisten keıin «Astana» 29 upaıǵa jınap, birinshi orynda tur. Odan keıingi oryndaǵy «Tobyldyń» 21, «Aqjaıyqtyń» 18 upaıy bar.
Esterińizge sala ketelik, buǵan deıin atalǵan týrda eki oıyn ótkizildi. Aldymen «Turan» syrt alańda qaraǵandylyq «Shahterdi», odan keıin Oraldyń «Aqjaıyǵy» óz alańynda Almatynyń «Qaıratyn» 1:0 esebimen jeńdi.
Al úshinshi oıynda «Aqtóbe» men «Qaısar» teń tústi.
Al 15 mamyrda saǵat 15.00-de «Qyzyljar» (Petropavl) men «Kaspıı» (Aqtaý) kezdesse, 17.00-de «Ordabasy» (Shymkent) men «Tobyl» (Qostanaı) komandalary sheberlik baıqasady. Atalǵan týrdy saǵat 19.00-de «Atyraý» jáne «Taraz» kezdesýi túıindeıdi.
