Fýtboldan Qazaqstan birinshiligi: «Astana» qatarynan eki márte teń tústi
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiliginiń on tórtinshi týryndaǵy taǵy eki oıyn aıaqtaldy, dep habarlaıdy QazAqparat tilshisi.
Alǵashqy kezdesýde Aqtaýda jergilikti «Kaspıı» elordalyq «Astana» komandasyn qabyldady. Atalǵan oıynnyń birinshi kezeńinde elordalyq klýbtan Tıgran Barsegıan 8, Roman Mýrtazaev 30-mınýttarda mergendik tanytty. Al ekinshi kezeńde «Kaspıı» sapynan Talǵat Ksýıapov 52, Aslan Darabaev 60-mınýttarda gol soǵyp, tarazy basyn teńestirdi. Kezdesýde 2:2 esebi tirkeldi. Osylaısha elordalyq klýb qatarynan eki oıynda teń nátıjeni qanaǵat tutyp otyr.
Taǵy bir kezdesýde Shymkentte «Ordabasy» men Qaraǵandynyń «Shahteri» sheberlik baıqasty. Bul oıynda qos komanda bir-biriniń qaqpasynan sańylaý taba alǵan joq. Oıynda 0:0 esebi tirkeldi.
Eske salsaq, keshe, 28 mamyrda atalǵan týrda úsh match ótkizildi. «Qyzyljar» men «Taraz» kezdesýinde 2:2 esebi tirkelse, «Qaırat» óz alańynda «Qaısardy» 1:0 esebimen jeńdi. Al óz alańynda Túrkistannyń «Turany» Taldyqorǵannyń «Jetisýyna» 0:2 esebimen jol berdi.
Aıta keteıik, búgin taǵy eki oıynda «Atyraý» men «Aqjaıyq» (Oral), «Tobyl» (Qostanaı) men «Aqtóbe» kezdesedi.
