Fýtboldan Qazaqstan birinshiligi: «Astana» ekinshi ret jeńildi
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiliginiń on segizinshi týrynda eki oıynnyń nátıjesi belgili boldy, dep habarlaıdy QazAqparat tilshisi.
Alǵashqy kezdesýde Petropavlda «Qyzyljar» men elordalyq «Astana» sheberlik baıqasty. Oıyn barysynda alań ıeleri jınaqy qımyl kórsetti. Olardyń qatarynan Maksım Drachenko 3, ıÝrıı Býshman 9-mınýttarda mergendik tanytty. Al 51-mınýtta elordalyq Islambek Qýat esep aıyrmasyn qysqartty. Odan keıin 68-mınýtta petropavldyq komandadan Darko Zorıch qaıtadan «Qyzyljardyń» basymdyǵyn arttyrdy. Elordalyq shabýylshy Abat Aıymbetov 86-mınýtta gol soǵyp, komandasyna úmit syılaǵan edi.
Kezdesýde «Qyzyljar» qarsylasyn 3:2 esebimen tize búktirdi. Bul - «Astananyń» qatarynan ekinshi jeńilisi.
Taǵy bir kezdesýde Qaraǵandynyń «Shahteri» óz alańynda «Aqtóbeden» 1:0 esebimen basym tústi. Kezdesý taǵdyryn 68-mınýtta qaraǵandylyq Jan-Álı Paırýz soqqan jalǵyz gol sheshti.
Sondaı-aq, búgin atalǵan týrda Shymkenttiń «Ordabasy» klýby óz alańynda Taldyqorǵannyń «Jetisýyn» qabyldaıdy.
Qalǵan tórt oıyn erteń, 28 maýsymda ótkiziledi. Bul kúni «Aqjaıyq» pen «Taraz», «Tobyl» men «Qaırat», «Kaspıı» men «Turan», «Atyraý» men «Qaısar» jasyl alańǵa shyǵady.
