Fýtboldan Qazaqstan birinshiligi: «Astana» «Atyraýdy» iri eseppen jeńdi
NUR-SULTAN. QazAqparat - Búgin, 10 sáýirde fýtboldan Premer-lıga komandalary arasyndaǵy el birinshiliginiń tórtinshi týry máresine jetti, dep habarlaıdy QazAqparat tilshisi.
Búgingi sońǵy kezdesýde elordada «Astana» men «Atyraý» komandalary sheberlik baıqasty. Bul kezdesýde alań ıeleri tizgindi óz qolyna alyp, jasyl alań tórinde basymdyǵyn baıqatty.
Esepti alǵash bolyp atyraýlyq komanda sapynan Djýnıor Aleks ashty. Odan keıin elordalyq klýbtan Abat Aıymbetov 23-mınýtta tarazy basyn teńestirdi. Al onyń komandalas áriptesi Abzal Beısebekov 20, 36-mınýttarda mergendigimen kózge tústi.
Ekinshi kezeńniń 64-mınýtta Abat Aıymbetov esepti ulǵaıta tústi. Kelesi kezekte atyraýlyq klýbtan Braıan 76-mınýtta bir golmen jaýap qaıyrdy. Oıyn sońyna taman Roman Mýrtazaev 90, 93-mınýttarda eki goldyń avtory atandy.
Osylaısha «Astana» qarsylasyn 6:2 esebimen tize búktirdi. Atalǵan jeńisten keıin segiz upaı jınap, týrnır kestesinde ekinshi orynǵa kóterildi. Kósh basynda 10 upaımen Almatynyń «Qaırat» komandasy keledi. Úzdik úshtikti enshisinde segiz upaıy bar «Taraz» komandasy túıindep tur.
Atalǵan týrdaǵy tórt oıyn keshe, 9 sáýirde ótkizilgen bolatyn. Sol kúni «Taraz» Qaraǵandynyń «Shahterin» 4:0 esebimen tize búktirse, Oraldyń «Aqjaıyǵy» Petropavldyń «Qyzyljaryna» 0:1 esebimen ese jiberdi. Al «Aqtóbe» men «Ordabasy» 4:4 esebimen teń tústi.
Búgin 9 cáýirde Qostanaıdyń «Tobyly» syrt alańda Taldyqorǵannyń «Jetisýyn» 2:0 esebimen súrindirse, Almatynyń «Qaıraty» óz alańynda Túrkistannyń «Turan» klýbyna 5:1 esebimen oısyrata jeńdi.
Endi besinshi týr oıyndary 13 jáne 14 sáýir kúnderi ótkiziledi. Aldymen 13 sáýirde
«Shahter» men «Aqjaıyq», «Qyzyljar» men «Aqtóbe» kezdesse, 14 sáýirde «Atyraý» men «Jetisý», «Kaspıı» men «Qaırat», «Tobyl» men «Qaısar», «Turan» men «Taraz», «Ordabasy» men «Astana» komandalary jasyl alańǵa shyǵady.
