Fýtboldan Qazaqstan birinshiligi: Alǵashqy oıynda «Astana» teń tústi
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan birinshiligi alǵashqy týrynyń eki oıyn nátıjesi belgili boldy, dep habarlaıdy QazAqparat tilshisi.
Birinshilik shymyldyǵyn «Ordabasy» (Shymkent) - «Maqtaral» (Túrkistan oblysy) komandalary arasyndaǵy oıyn ashty. Kezdesý barysynda komanda 1:1 esebine qanaǵat bildirip tarasty.
«Astana» (Nur-Sultan) men «Shahter» (Qaraǵandy) komandalary kezdesýinde esep ashylǵan joq. Qos komanda 0:0 esebimen teń tústi.
Dál qazir birinshi kezeńnen keıin «Atyraý» men «Aqsý» (Pavlodar oblysy), «Kaspıı» (Aqtaý) men «Qyzyljar» (Petropavl) klýbtary kezdesý ótip jatyr. Ázirge esep 0:0.
Sondaı-aq, alǵashqy oıyn kúnin 17.00-de «Turan» (Túrkistan) men «Taraz» komandalary túıindeıdi. Atalǵan kezdesý «Qazsport» telearnasynan tikeleı efırde kórsetiledi.
Al 6 naýryzda qalǵan eki oıyn bolady. Aldymen 15.00-de «Qaırat» (Almaty) men «Aqtóbe», 17.00-de «Tobyl» (Qostanaı) men «Aqjaıyq» (Oral) komandalary oınaıdy. Bul kúngi eki oıyn da «Qazsport» telearnasynan tikeleı efırde kórsetiledi.