Fýtboldan Qazaqstan birinshiligi: «Aqtóbe» jeńilister serııasyn toqtatty
NUR-SULTAN. QazAqparat - Fýtboldan Premer-lıga komandalary arasyndaǵy el birinshiliginiń onynshy týrynda taǵy bir oıyn máresine jetti, dep habarlaıdy QazAqparat tilshisi.
Bul kezdesýde Taldyqorǵanda jergilikti «Jetisý» klýby «Aqtóbeni» qabyldady.
Oıyn barysynda esepti alǵash bolyp alań ıeleri qatarynan Ravıl Atyhanov 6-mınýtta ashqan bolatyn.
Odan keıingi kezekte «Aqtóbe» sapynan ıÝrıı Pertsýh 10, Igor Sergeev 31, 71, 74, Boıan Dýbaıchıch 60-mınýtta gol soǵyp, olar iri eseppen jeńiske jetti.
«Aqtóbe» alań ıelerin 5:1 esebimen jeńdi.
Osylaısha aqtóbelik ujym tórt oıynǵa sozylǵan jeńilister serııasyn toqtatty. Osyndaı sátsizdikten keıin ótken týrda olardyń bapkeri Alekseı Baga qyzmetinen ketti.
«Jetisý» jeńilister serııasyn bes oıynǵa jetkizdi. Týrnır kestesinde eń sońǵy orynda tur.
Búgin taǵy eki oıyn ótkiziledi. Dál qazir Qostanaıda «Tobyl» komandasy «Atyraýmen» kezdesýde. Ázirge esep 0:0.
Al elorda ýaqytymen saǵat 20.00-de Túrkistanda jergilikti «Turan» jáne Petropavldyń «Qyzyljarymen» kezdesedi.
Aıta keteıik, atalǵan týrdaǵy tórt oıyn 8 mamyr kúni ótkizildi.
Sol kúni óz alańynda Qyzylordanyń «Qaısary» Oraldyń «Aqjaıyǵynan», «Taraz» elordalyq «Astanadan» 0:1 esebimen jeńilip qaldy .
Al Almatynyń «Qaıraty» Qaraǵandynyń «Shahterimen» 1:1, Aqtaýdyń «Kaspııi» Shymkenttiń «Ordabasy» klýbymen 0:0 esebimen teń tústi.
