Fýtboldan Qazaqstan birinshiligi: «Aqtóbe» men «Qaısar» teń tústi
NUR-SULTAN. QazAqparat – Búgin fýtboldan Premer-lıga komandalary arasyndaǵy el birinshiliginiń on birinshi týryndaǵy taǵy bir oıyn aıaqtaldy, dep habarlaıdy QazAqparat tilshisi.
Bul joly «Aqtóbe» óz alańynda Qyzylordanyń «Qaısar» komandasyn qabyldady. Eki komanda da týrnır kestesinde tómengi oryndarda tur. Alań ıeleri 13 upaımen toǵyzynshy orynda tursa, qyzylordalyqtar nebári 6 upaımen 13 oryndy mise tutty.
Oıyn barysynda «Qaısar» alǵashqy olyp esep ashty. Ony 27-mınýtta Karolıs Laýkjemıs óziniń enshisine jazdy. Al 43-mınýtta aqtóbelik Igor Sergeev tarazy basyn teńestirip ketti. Osylaısha kezdesý 1:1 esebimen teń aıaqtaldy.
Esterińizge sala ketelik, buǵan deıin atalǵan týrda eki oıyn ótkizildi. Aldymen «Turan» syrt alańda qaraǵandylyq «Shahterdi», odan keıin Oraldyń «Aqjaıyǵy» óz alańynda Almatynyń «Qaıratyn» 1:0 esebimen jeńdi.
Endi 20.00-de «Astana» (Nur-Sultan) men «Jetisý» (Taldyqorǵan) sheberlik baıqasady.
Al 15 mamyrda saǵat 15.00-de «Qyzyljar» (Petropavl) men «Kaspıı» (Aqtaý) kezdesse, 17.00-de «Ordabasy» (Shymkent) men «Tobyl» (Qostanaı) komandalary sheberlik baıqasady. Atalǵan týrdy saǵat 19.00-de «Atyraý» jáne «Taraz» kezdesýi túıindeıdi.
