Fýtboldan Qazaqstan áıelder lıgasynyń jańa maýsymy qashan bastalady

ASTANA. KAZINFORM - 2026 jyly fýtboldan Qazaqstan áıelder lıgasynyń jańa maýsymy sáýir aıynda bastalady.

Bul jóninde Qazaqstan fýtbol federatsııasy málim etti.

Jańa maýsymda chempıondyq ataqqa 19 komanda talasady. Olardyń qatarynda «Aqtóbe», «Altaı» (Óskemen), «Astana», «Atyraý», BIІK (Shymkent), «Elimaı» (Semeı), «Jeńis» (Astana), «Jetisý» (Taldyqorǵan), «Ertis» (Pavlodar), «Qaırat» (Almaty), «Qaısar» (Qyzylorda), «Kaspıı» (Aqtaý), «Qyzyljar» (Petropavl), «Oqjetpes» (Kókshetaý), «Ordabasy» (Shymkent), «Tobyl» (Qostanaı), «Turan» (Túrkistan), «Ulytaý» (Jezqazǵan), «Shahter» (Qaraǵandy) komandalary bar.

Aıta ketsek, budan buryn fýtboldan Qazaqstan Premer-lıgasy 2026 jylǵy maýsymynyń oıyn kúntizbesi tolyq belgili boldy.

Premer-lıga bıylǵy maýsymynyń alǵashqy týrynda 7 naýryzda «Aqtóbe» - «Tobyl» (Qostanaı), «Altaı» (Óskemen) - «Qaırat» (Almaty), «Oqjetpes» (Kókshetaý) - «Elimaı» (Semeı), «Ordabasy» (Shymkent) - «Ertis» (Pavlodar), 8 naýryzda «Astana» - «Jetisý» (Taldyqorǵan), «Atyraý» - «Ulytaý» (Jezqazǵan), «Qaısar» (Qyzylorda) - «Jeńis» (Astana), «Qyzyljar» (Petropavl) - «Kaspıı» (Aqtaý) oınaıdy.

Al fýtboldan Birinshi lıga komandalary arasyndaǵy Qazaqstan birinshiligi sáýir aıynda jalaýyn kóteredi.

Birinshilikke barlyǵy 14 komanda qatysady dep josparlanyp otyr. Qaı komandalardyń qatysatyny lızentsııa alǵannan keıin tolyq belgili bolady.