Fýtboldan Qazaqstan áıelder quramasynyń bas bapkeri ómirden ozdy
NUR-SULTAN. QazAqparat - Fýtboldan Qazaqstan áıelder quramasynyń bas jattyqtyrýshysy Razııa Núrkenova kenetten qaıtys boldy, dep habarlaıdy QazAqparat Qazaqstan fýtbol federatsııasyna silteme jasap.
Razııa Tóleýqyzy Núrkenova 52 jastan asqan shaǵynda kenetten kóz jumǵan. Bul esim mamandar men jankúıerler arasynda keńinen tanymal. Ol kezinde ulttyq quramanyń alǵashqy shabýylshysynyń biri bolǵan edi.
R. Núrkenova sporttyq mansabyn qaraǵandylyq «Olımp» áıelder fýtbol klýbynda bastaǵan. Bul komandada ol 1987-1991 jyldardyń aralyǵynda oıyn kórsetti. Komanda kapıtany mindetin atqardy. 1992 jyly Reseıdiń Samara qalasynyń TsSKA VKS fýtbol klýbyna aýysyp, onda 2001 jylǵa deıin shabýyl shebindegi jartylaı qorǵaýshy boldy.
R. Núrkenova kezinde KSRO, TMD, Qazaqstan jáne Reseı quramalaryna da shaqyrylǵan. Sportshylyq mansaby aıaqtalǵannan keıin fýtbol tóreshisi bolsa, keıinnen bapkerlik qyzmetpen aınalysty. Fýtboldan Qazaqstan jáne Reseı sport sheberi.
