Fýtboldan Qazaqstan áıelder quramasynyń bas bapkeri qyzmetinen ketti
ASTANA. KAZINFORM — Madııar Kembilov fýtboldan Qazaqstan áıelder quramasynyń bas bapkeri qyzmetindegi jumysyn aıaqtady.
Bul jóninde Qazaqstan fýtbol federatsııasy málim etti.
Madııar Kembilov fýtboldan Qazaqstan áıelder quramasynyń bas bapkeri qyzmetine 2023 jyly keldi.
Sondaı-aq Qazaqstan 19 jasqa deıingi jasóspirimder qyzdar quramasynyń aǵa bapkeri qyzmetinen Janna Malgajdarova ketti. Ol komandany 2025 jyldyń mamyr aıynan beri basqaryp keldi.
Mamandarmen jumys eki taraptyń kelisimi boıynsha toqtatyldy.
— Qazaqstan fýtbol federatsııasy Madııar Kembilov pen Janna Malgajdarovaǵa atqarǵan eńbegi men áıelder fýtbolynyń damýyna qosqan úlesi úshin alǵys bildirdi. Sonymen birge, eki maman da QFF qurylymynda jumysyn jalǵastyryp, eldegi áıelder fýtbolyn júıeli damytýǵa baǵyttalǵan aldaǵy jobalarǵa qatysady, — dep jazylǵan habarlamada.
Federatsııanyń habarlaýynsha, jaqyn ýaqytta QFF-nyń tehnıkalyq damý komıteti bos bapkerlik qyzmetterge úmitkerlerdi tyńdap, talqylaý qorytyndysy boıynsha QFF Atqarýshy komıtetine usynys jasaıdy.
Eske salsaq, budan buryn Bokstan Qazaqstan erler quramasynyń bas bapkeri aýysty.