Fýtboldan Qazaqstan áıelder quramasy Qyrǵyzstan komandasyn ekinshi ret jeńdi

ASTANA. KAZINFORM - Fýtboldan Qazaqstan áıelder quramasy Qyrǵyzstan komandasymen ekinshi joldastyq kezdesýinde de jeńiske jetti.

Oıyn barysynda qurama sapynan Ámına Bıbosynova men Tomırıs Rahatjan gol soqty. Al Qyrǵyzstannan Nagıma Týralıeva kózge tústi.

Osylaısha qazaqstandyq fýtbolshylar atalǵan qarsylasynan 2:1 esebimen basym tústi.

Kapıtan rólin alǵash ret Ámına Bıbosynova atqardy. Al ulttyq qurama sapynda 9 birdeı oıynshy debıýt jasady. Olardyń qatarynda Ásel Ánýarbek, Toǵjan Bekpenbet, Adelııa Bekqojına, Nursaıa Sultan, Ásel Jolbolat, Karına Botabek, Antastasııa Tıan, Jansezim Aısapar jáne Arý Ermaǵambetova bar.

Aıta ketsek, budan buryn da qazaqstandyq fýtbolshylar Qyrǵyzstandy 3:1 esebimen jeńgen edi.

Oqý-jatttyǵý jıyny 23 mamyrda Almaty qalasyndaǵy «Qaırat» fýtbol klýbynyń bazasynda bastaldy.

El quramasy Ulttar lıgasy S dıvızıony úshinshi tobynda synǵa túsip jatyr. Qarsylastary — Armenııa, Lıýksembýrg jáne Lıhtenshteın.

Alǵashqy eki oıynda qazaqstandyq fýtbolshylar Armenııaǵa 0:2 esebimen jeńilse, odan keıin Lıýksembýrgpen 2:2 esebimen teń tústi. Al úshinshi týrda Lıhtenshteındi 4:0 esebimen tize búktirse, tórtinshi týrda 3:2 esebimen basym tústi.

Aıta ketsek, Qazaqstan áıelder quramasy ÝEFA Ulttar lıgasy aıasynda sheshýshi eki oıynyn ótkizedi. Aldymen 30 mamyrda Qazaqstan quramasy Lıhtenshteındi qabyldasa, araǵa úsh kún salyp Lıýksembýrgpen kezdesedi.