Fýtboldan Qazaqstan áıelder quramasy álem chempıonatyna irikteý kezeńin sátti bastady

ASTANA. KAZINFORM – Fýtboldan Qazaqstan áıelder quramasy búgin 2027 jylǵy álem chempıonatynyń irikteý kezeńindegi alǵashqy oıynyn Armenııaǵa qarsy ótkizdi.  

Kezdesý barysynda qazaqstandyq fýtbolshylar jınaqy oıyn órnegin kórsetti. Alǵashqy mınýttan qarsylastar qaqpasy mańynda shabýyl uıymdastyryp, jyldam gol soǵý múmkindigin izdedi. Nátıjesinde oıynnyń 35-mınýtynda Aleksandra Býrova mergendigimen kózge tústi. Ekinshi taımda alań ıeleri osy qarqynyn báseńdetken joq. Matchtyń 76-mınýtynda Anelııa Mamyrova esepti ústemeleı tússe, Bıbigúl Nýrýsheva 79-mınýtta oıynnyń núktesin qoıdy. Osylaısha qazaqstandyq fýtbolshylar qarsylasynan 3:0 esebimen basym tústi.

Endi otandastarymyz aldaǵy oıynyn 7 naýryzda elordada Belarýs quramasyna qarsy ótkizedi. 

Іritkeý kezeńi oıyndary naýryz, sáýir jáne maýsym aılarynda ótedi.

Jaqynda ulttyq qurama tizginin qolyna alǵan otandyq maman Begaıym Qyrǵyzbaeva alǵashqy oqý-jattyǵý jıynyna 27 fýtbolshyny shaqyrdy.

– Búgingi oıyndy asyǵa kúttik. Birshama úzilisten keıin úlken fýtbolǵa qaıta oraldyq. Bul kezdesý – men úshin asa mańyzdy. Árbir match – biz úshin úlken múmkindik, - dedi fýtboldan Qazaqstan áıelder quramasynyń bas bapkeri Begaıym Qyrǵyzbaeva oıyn aldynda bergen suhbatynda.

Eske salsaq, budan buryn fýtboldan Qazaqstan áıelder lıgasynyń jańa maýsymy qashan bastalatyny belgili boldy.

2026 jyly fýtboldan Qazaqstan áıelder lıgasynyń jańa maýsymy sáýir aıynda bastalady. Jańa maýsymda chempıondyq ataqqa 19 komanda talasady. Olardyń qatarynda «Aqtóbe», «Altaı» (Óskemen), «Astana», «Atyraý», BIІK (Shymkent), «Elimaı» (Semeı), «Jeńis» (Astana), «Jetisý» (Taldyqorǵan), «Ertis» (Pavlodar), «Qaırat» (Almaty), «Qaısar» (Qyzylorda), «Kaspıı» (Aqtaý), «Qyzyljar» (Petropavl), «Oqjetpes» (Kókshetaý), «Ordabasy» (Shymkent), «Tobyl» (Qostanaı), «Turan» (Túrkistan), «Ulytaý» (Jezqazǵan), «Shahter» (Qaraǵandy) komandalary bar.