Fýtboldan Qazaqstan áıelder quramasy álem chempıonaty joldamasyna talasady
ASTANA. KAZINFORM - Fýtboldan Qazaqstan áıelder quramasy Astanada álem chempıonaty irikteý kezeńi pleı-off satysynda búgin, 9 qazanda elordada Irlandııamen alǵashqy kezdesýin ótkizedi.
Bul oıyndar 9 qazanda Qazaqstan ýaqytymen 16:00-de «Astana Arena» stadıonynda ótse, 13 qazanda 23:30-da Irlandııanyń Kork qalasyndaǵy «Park I Kıv» stadıonynda bolady.
Qazaqstan áıelder quramasy maýsym aıynda 2027 jyly áıelder arasyndaǵy fýtboldan álem chempıonatynyń eýropalyq irikteý kezeńinde S dıvızıonynyń 6-tobynda Belarýs jáne Armenııa quramalarymen synǵa tústi. Begaıym Qyrǵyzbaevanyń shákirtteri 7 upaı jınap, topta ekinshi oryndy ıelendi. Osylaısha olar S lıgasyndaǵy ekinshi oryn alǵan úzdik quramalar qataryna enip, olar pleı-off kezeńiniń birinshi raýndyna ótti.
Otandastarymyz Armenııa (3:0, 1:1), Belarýs (1:0, 0:1) quramalarymen sheberlik baıqasty. Jarys erejesi boıynsha ótpeli matchtarda A, V jáne S lıgasy quramalary 2027 jylǵy álem chempıonatyna joldama úshin baq synaıdy.
Bul kezeńde jalpy esepte 7 tikeleı joldama jáne 1 qurlyqaralyq pleı-off joldamasy sarapqa salynady.
Qazaqstan quramasynyń tizimi
Qaqpashylar: Angelına Portnova («Asteras Trıpolıs», Grekııa), Nazym Ismaılova («BIІK-Shymkent»), Vıktorııa Zeınalı («Elimaı»), Ásel Ánýarbek («Ulytaý»).
Qorǵaýshylar: Aleksandra Býrova, Bıbigúl Nurysheva (ekeýi de – «BIІK-Shymkent»), Ásel Qurtanova («Qyzyljar»), Anastasııa Vlasova («Aqtóbe»), Tomırıs Rahatjan («Qaırat»), ıÝlııa Mıasnıkova («Dınamo», Reseı), Aleksandra Nabokova («Shahter»), Krıstına Shýstova («Elimaı»), Anelıa Suńqarova («Astana»), Adelııa Bekqojına («Jeńis»).
Jartylaı qorǵaýshylar: Aıda Gaıstenova, Karına Jumabaıqyzy Áselhan Turlybekova, Ekaterına Babshýk (bári – «Aqtóbe»), Anastasııa Nızamýtdınova («Enıseı», Reseı), Qazyna Norbaeva («Gýrnık Lenchna», Polsha), Fatıma Satyǵalıeva («Elimaı»), Valerııa Popova («BIІK-Shymkent»), Polına Osıpova («Tobyl»).
Shabýylshylar: Nazym Aldanazar («Qaırat»), Anelıa Mamyrova («Elimaı»), Ámına Bıbosynova («Týrbıne Potsdam», Germanııa).
Áıelder arasyndaǵy onynshy álem chempıonaty 2027 jyldyń 24 maýsymy men 25 shildesi aralyǵynda Brazılııada ótedi. Oǵan úzdik 32 ulttyq qurama qatysady.
Eske salsaq, budan buryn fýtboldan UEFA Ulttar lıgasy tórtinshi týrynda Qazaqstan quramasy elordada Farer araldarymen teń oınady.
