Fýtboldan Qazaqstan áıelder quramasy álem chempıonaty irikteý kezeńin bastaıdy

ASTANA. KAZINFORM - Fýtboldan Qazaqstan áıelder quramasy búgin 2027 jylǵy álem chempıonatynyń irikteý kezeńindegi alǵashqy oıynyn Armenııaǵa qarsy ótkizedi.

Bul kezdesý Qazaqstan ýaqytymen 19:55-te bastalyp, «Qazsport» telearnasynan tikeleı efırde kórsetiledi.

Qazaqstandyq fýtbolshylar jarystyń bul kezeńinde Armenııa men Belarýspen sheberlik baıqasady. Oıyndar naýryz, sáýir jáne maýsym aılarynda ótedi.

Jaqynda ulttyq qurama tizginin qolyna alǵan otandyq maman Begaıym Qyrǵyzbaeva alǵashqy oqý-jattyǵý jıynyna 27 fýtbolshyny shaqyrdy.

- Búgingi oıyndy asyǵa kúttik. Birshama úzilisten keıin úlken fýtbolǵa qaıta oraldyq. Bul kezdesý men úshin asa mańyzdy. Árbir match - biz úshin úlken múmkindik. Sondyqtan aldaǵy kezdesýde jaqsy oıyn kórsetip, bıylǵy maýsymdy joǵary deńgeıde bastaýǵa kúsh salamyz, - dedi elimizdiń áıelder quramasynyń bas bapkeri Begaıym Qyrǵyzbaeva.

Qazaqstan áıelder quramasy

Qaqpashylar: Angelına Portnova («Asteras Trıpolıs», Grekııa), Nazym Ismaılova («BIІK-Shymkent»), Vıktorııa Zeınalı («Elimaı»).

Qorǵaýshylar: Aleksandra Býrova, Bıbigúl Nurysheva (ekeýi de – «BIІK-Shymkent»), Anastasııa Vlasova («Aqtóbe»), Qazyna Nurbaeva («Gýrnık Lenchna», Polsha), Tomırıs Rahatjan («Qaırat»), Aleksandra Nabokova («Shahter»), Krıstına Shýstova («Elimaı»), Adelııa Bekqojına («Jeńis»), Anel Blank («Qyzyl-Jar»), Anelıa Suńqarova («Astana»), Anelıa Berikova («Býdýchnost», Chernogorııa).

Jartylaı qorǵaýshylar: Ksenıa Haırýlına, Elmıra Abdýlaeva (ekeýi de – «Qaırat»), Karına Jumabaıqyzy («Aqtóbe»), Adına Beıbýt («Astana»), Anastasııa Nızamýtdınova («Enıseı», Reseı).

Shabýylshylar: Aıda Gaıstenova, Áselhan Turlybekova, Ekaterına Babshýk (bári – «Aqtóbe»), Nazym Aldanazar, Polına Týchına (ekeýi de – «Qaırat»), Anelıa Mamyrova, Fatıma Satyǵalıeva (ekeýi de – «Elimaı»), Amına Bıbosynova («Týrbıne Potsdam», Germanııa).

Otandastarymyz 3 jáne 7 naýryz kúnderi elordadaǵy «Astana Arenada» Armenııa jáne Belarýs quramalarymen jasyl alańǵa shyǵady.

Eske salsaq, budan buryn fýtboldan Qazaqstan áıelder lıgasynyń jańa maýsymy qashan bastalatyny belgili boldy.