Fýtboldan «Qaırat» pen «Pırın» komandalary arasyndaǵy kezdesý 2:3 esebimen aıaqtaldy
ALMATY. 16 qańtar. QazAqparat - Keshe Túrkııada ekinshi oqý-jattyǵý jıynyn ótkizip jatqan Almatynyń «Qaırat» fýtbol klýby Bolgarııanyń Gotse Delcheva qalasynyń «Pırın» komandasymen sparrıngtik kezdesý ótkizdi.
Slovakııalyq Vladımır Vaıss jattyqtyratyn almatylyqtardan Oleg Nedashkovkıı men Maqsat Baıjanov kózge tústi. Olar birinshi bop esep ashqanymen, tóreshi belgilegen penaltıden keıin qarsylastary oıynnyń alǵashqy jartysynyń aıaǵyna taman esepti teńestirip ketti. Al oıynnyń ekinshi jartysynda qonaqtar basym túsip, qorytyndy esep 2:3 bolyp aıaqtaldy.
Almatylyqtardyń kelesi sparrıngtik kezdesýi 18 qańtarda ótpek. Ázirgi qarsylastyń kim bolatyny belgisiz. Jalpy «Qaırat» komandasynyń 8 qańtarda bastaǵan bul jıyny 22-sinde aıaqtalady.
