Fýtboldan Germanııa chempıonaty qaıta jalǵasty
NUR-SULTAN. QazAqparat – Eki aıǵa sozylǵan úzilisten keıin fýtboldan Germanııa chempıonaty qaıta jalǵasty, dep habarlaıdy QazAqparat tilshisi.
Eýropadaǵy jetekshi tórt chempıonattyń qataryna kiretin býndeslıganyń 26-týry kórermendersiz ótýde.
Altyn júldeden úmitker Dortmýndtyń «Borýssııa» komandasy óz alańynda «Shalkeni» qabyldap, 4:0 esebimen tas-talqan etti. Bul matchta alań ıelerinen portýgalııalyq Rafael Gerreırý qos goldyń avtory atansa, nıderlandylyq jas shabýylshy Erlıng Holann men belgııalyq Torgan Azar da qur ketken joq.
Býndeslıgada úzdik tórttikke ilingen komandalar chempıondar lıgasyna joldama alady. Sodan úmitkerlerdiń biri Menhengladbahtyń «Borýssııasy» da óz básekesin sátti ótkizip, úshinshi orynǵa kóterildi. Maındaǵy Frankfýrtta
jergilikti «Aıntrahtpen» bolǵan matchtyń alǵashqy jeti mınýtynda-aq qonaqtardan frantsııalyqtar Alassan Plea men Markýs Tıýram eki gol soǵyp, máseleni sheship tastady deýge bolady. Ekinshi taımda aljırlik qorǵaýshy Ramı
Bensebaını 11 metrlik penaltıden esepti 3:0-ge jetkizse, alań ıelerinen portýgalııalyq Andre Sılva esepti qysqarta aldy.
Esesine júldeli oryndarǵa qol sozyp kele jatqan, chempıondar lıgasynda oınap júrgen «Leıptsıg» komandasy óz alańynda súrindi. «Fraıbýrgtyń» qorǵaýshysy, germanııalyq Manýel Gýlde birinshi taımda esep ashyp,
komandasyn alǵa shyǵardy. Al alań ıeleri kóptegen múmkindikti múlt jiberdi. Tek komanda kapıtany, danııalyq shabýylshy ıÝssýf Poýlsen tarazy basyn teńestire aldy.
Budan keıin «Leıptsıg» tipti jeńilip qala jazdady. Abyroı bolǵanda, tóreshiler durys sheshim qabyldap, oıynnan tys qalǵan qonaqtardyń qosymsha mınýtta soqqan dobyn
eseptegen joq. Sóıtip bul oıyn 1:1 esebimen teń aıaqtaldy.
«Volfsbýrg» Aýgsbýrgta jergilikti klýbty 2:1 esebimen tize búktirip, Eýropa lıgasynda oınaýǵa múmkindik beretin altynshy orynǵa shyqty.
Býndeslıgada 55 upaımen kósh bastap kele jatqan ataqty «Bavarııa» (Mıýnhen) 26-týrda jeksenbi kúni Berlınde «Ýnıon» komandasymen sheberlik baıqasady.
Mıýnhendikterdi qos «Borýssııa» ókshelep keledi.
Dortmýndtyqtarda 54 upaı bolsa, Menhengladbah klýbynyń odan eki upaıy kem. 51 upaı jınaǵan «Leıptsıg» tórtinshi orynda.
Besinshi satydaǵy «Baıer» (47 upaı) syrt alańda kósh sońyndaǵy «Verdermen» kúsh synasady.
Eske sala keteıik, budan buryn fýtboldan Germanııa birinshiligi qaıta jalǵasatynyn jazǵan bolatynbyz.
