Fýtboldan Frantsııa quramasy Ulttar lıgasynda qola júldege qol jetkizdi

ASTANA. KAZINFORM - Búgin fýtboldan UEFA Ulttar lıgasynda Frantsııa quramasy qola júldege ıe boldy. Kılıan Mbappe bastaǵan frantsııalyq fýtbolshylar 3-oryn úshin Germanııamen sheberlik baıqasty. 

Oıyn basynda nemis aıaqdopshylarynyń basymdyǵy baıqaldy. Olardyń tarapynan gol soǵatyn kóptegen múmkindik boldy. Dese de olar ony tıimdi paıdalana alǵan joq. Esesine frantsııalyq fýtbolshylar qarymta shabýyl uıymdastyrdy. Osyndaı sátterdiń birinde Kılıan Mbappe 45-mınýtta kózdegen nysanadan múlt ketken joq.

Kezdesýdiń ekinshi kezeńinde Germanııa quramasynyń oıynshylary tarazy basyn teńestirýge umtyldy. Alaıda qarsylastar sapynan oıynnyń 84-mınýtynda Kılıan Mbappe shyǵarǵan pasty onyń áriptesi Maıkl Olıse qaqpa torynda týlatty. 

Ulttar lıgasy 2018 jyldan beri turaqty túrde ótkizilip keledi. Qazirge deıin Portýgalııa, Frantsııa, Ispanııa quramalary chempıon boldy. 

Aıta ketsek, Qazaqstan quramasy 2024 jyly Ulttar lıgasynda V dıvızıonynda úshinshi topta Norvegııa, Slovenııa, Aýstrııamen baq synap, tórtinshi oryndy mise tutty. Saldarynan qaıtadan S dıvızıonyna túsip qaldy. 

Endi Germanııanyń Mıýnhen qalasyndaǵy «Mıýnhen-Arena» stadıonynda qazaqstandyq ýaqytpen 23:50-de Portýgalııa men Ispanııa jasyl alańǵa shyǵady. Oıyn «Qazsport» telearnasynan tikeleı efırde kórsetiledi.