Fýtboldan Eýropa lıgasy: Fınalda «Chelsı» men «Arsenal» kezdesedi
NUR-SULTAN. QazAqparat - Búgin ÝEFA Eýropa lıgasy jartylaı fınalyndaǵy taǵy bir oıyn aıaqtaldy.
Anglııanyń «Chelsı» komandasy óz alańynda Germanııanyń Maındaǵy Frankfýrt qalasynyń «Aıntrahtyn» qabyldady. Alǵashqy kezdesýde jeńimpaz anyqtalǵan joq. Oıyn 1:1 esebimen teń aıaqtalǵan edi. Búgingi kezdesýde de soǵan uqsas jaǵdaı órbidi. «Chelsı» sapynan 28-mınýtta Rýben Loftýs-Chık óz komandasyn alǵa shyǵarsa, «Aıntraht» oıynshysy Lýka Iovıch 49-mınýtta tarazy basyn teńestirdi. Negizgi kezeń 1:1 esebimen teń aıaqtaldy. Nátıjesinde kezdesý qosymsha kezeńge ulasty. Degenmen qosymsha kezeńde de jeńimpaz anyqtalǵan joq. Penaltı tebýde «Chelsıdiń» joly boldy.
Esterińizge sala ketelik, «Chelsı» ÝEFA Eýropa lıgasynda 2012/2013 jylǵy kezeńde chempıon atandy. Al «Aıntraht» óziniń tarıhynda tuńǵysh ret jartylaı fınalǵa deıin jetip otyr.
Budan buryn Anglııanyń «Arsenal» klýby syrt alańda Ispanııanyń «Valensııasyn» 4:2 esebimen jeńip, fınalǵa shyqqanyn habarlaǵan edik. Atalmysh komandalar arasyndaǵy alǵashqy kezdesýde aǵylshyndar 3:1 esebimen basym tústi.
Osylaısha ÝEFA Eýropa lıgasynda da qos aǵylshyndyq klýb bas júldeni sarapqa salatyn boldy. Budan buryn ÝEFA Chempıondar lıgasynda Anglııanyń «Lıverpýl» men «Tottenhem Hotspýrs» komandalary básekege túsýge múmkindik aldy.
ÝEFA Eýropa lıgasynyń fınaldyq oıyny 29 mamyrda Baký qalasynda ótkiziledi.
Buǵan deıin ÝEFA Chempıondar lıgasynyń fınalyna Anglııanyń «Lıverpýl» jáne «Tottenhem Hotspýrs» komandalary shyqqany habarlanǵan bolatyn.
