Fýtboldan Eýropa lıgasy: «Arsenal» fınalǵa shyqty

Ispanııanyń «Valensııa» klýby óz alańynda Anglııanyń «Arsenalyn» qabyldady. Esterińizge sala ketelik, eki komandanyń alǵashqy kezdesýinde aǵylshyndar 3:1 esebimen basym túsken edi. Búgingi kezdesýde ıspandar sol ketken eseni qaıtarýǵa tyrysty. Jyldam gol soǵý jolyn izdedi. Degenine jetip, oıynnyń 11-mınýtynda Kevın Gameıro aǵylshyndyq klýb qaqpasyn dál kózdedi. Kóp uzamaı «Arsenal» shabýylshysy Per-Emerık Obameıang tarazy basyn teńestirip ketti. Bul oıynnyń 16-mınýty bolatyn. Aǵylshyndar ekinshi kezeńde taǵy bir gol soǵyp, jaǵdaıyn odan ári jaqsarta tústi. «Arsenaldyń» taǵy bir shabýylshysy Aleksandr Lıakazett 50-mınýtta alań ıelerin qapy qaldyrdy. Bul gol «Valensııanyń» namysyna tıgen sekildi. Budan keıin birshama shabýyl órbitti. Sonyń birinde 58-mınýtta Kevın Gameıro taǵy bir goldyń avtory atandy. Osylaısha tarazy basy teńesti. Degenmen alań ıeleri bul esepti uzaq ustap tura alǵan joq. Oıynnyń 69 jáne 88-mınýttarynda Per-Emerık Obameıang taǵy da eki gol soǵyp ketti. Sonymen «Arsenal» atalmysh qarsylasyn 4:2 esebimen jeńip, aqtyq saıysqa shyqty.

«Valensııa» ÝEFA Eýropa lıgasynda 2003/2004 jylǵy kezeńde kýbokty enshilegen bolatyn. Al «Arsenal» atalmysh týrnırdiń bastaýy sanalatyn Jármeńke kýbogynda 1969/1970 jyldarda jeńiske jetken edi. 1999/2000 jyldarda ÝEFA kýbogynyń (Eýropa lıgasynyń burynǵy ataýy) fınalynda Túrkııanyń «Galatasaraı» klýbyna penaltıden jol berip qoıdy.

Dál qazir Anglııada «Chelsı» men Germanııanyń Maındaǵy Frankfýrt qalasynyń «Aıntraht» komandalarynyń negizgi kezeńi 1:1 esebimen aıaqtaldy. Alǵashqy kezdesýde de dál osy nátıje tirkelgen edi. Sondyqtan jeńimpaz qosymsha kezeńde nemese penaltı tebý arqyly anyqtalýy múmkin.

ÝEFA Eýropa lıgasynyń fınaldyq oıyny 29 mamyrda Baký qalasynda ótkiziledi.

Budan buryn biz ÝEFA Chempıondar lıgasynyń fınalyna Anglııanyń «Lıverpýl» jáne «Tottenhem Hotspýrs» komandalary shyqqanyn habarlaǵan edik.