Fýtboldan Eýropa chempıonatynyń irikteý matchtary ótetin kúnderi Astanada kólik qozǵalysyna shekteý qoıylady, keıbir kósheler tolyq jabylady
STANA. Qazannyń 4-i. QazAqparat /Gúlmıra Álıakparova/ - Astanada fýtboldan Eýropa chempıonatynyń irikteý matchtary ótetin qazannyń 8-i men 12-si kúnderi avtokólikterdiń qozǵalysyna shekteý qoıylady, keıbir kóshelerde qozǵalystar múlde toqtatylady. Bul týraly búgin ótken baspasóz máslıhatynda málim boldy.
Buǵan deıin habarlanǵandaı, 2012 jylǵy Eýropa chempıonatynyń irikteý matchtary elordadaǵy «Astana-Arena» stadıonynda qazannyń 8-i kúni Qazaqstan men Belgııa, qazannyń 12-si kúni Qazaqstan men Germanııa qurama komandalarynyń arasynda ótedi.
Qazaqstan Fýtbol federatsııasynyń (QFF) atqarýshy dırektory Álııa Dúısekeeva atap kórsetkendeı, 2009 jyldyń kúzinde «Astana-Arena» stadıonynda Qazaqstannyń ulttyq quramasynyń alǵashqy oıyndary ótti. Oıyn Horvatııa quramasymen boldy. Osy matchqa jekemenshik kólikterimen kelgen jankúıerler úshin stadıon alańyna kirýge ruqsat etilmedi. Budan keıin jankúıerlerden kóptegen ótinishter men shaǵymdar túsken. Osyny eskere otyryp, Qazaqstannyń Fýtbol federatsııasy Astana qalasynyń Jol polıtsııasy basqarmasymen (JPB) aqyldasa otyryp, Túrkııanyń quramasymen bolǵan kelesi kezdesýde stadıonnyń avtokólik turaǵyna kirip-shyǵýǵa shekteý qoımady.
Ókinishke qaraı, deıdi Á.Dúısekeeva, match kezinde 1 myń orynǵa eseptelgen avtokólik turaǵy ǵana emes, strategııalyq mańyzy bar - Astana áýejaıy baǵytyndaǵy kúre joldyń boıy da kólikterde lyq tolyp ketken. JPB-nyń deregi boıynsha, stadıon avtoturaǵy men onyń aınalasyna barlyǵy 6 myńnan astam kólik qoıyldy. «Bul jaǵdaı ÝEFA-nyń qaýipsizdik boıynsha talaptary men erejelerine qaıshy. Sebebi stadıonǵa alyp baratyn jol, tótenshe jaǵdaı qalyptasqan jaǵdaıda tolyǵymen ashyq bolýy qajet», - deıdi ol.
Osyǵan oraı, Astana qalalyq Jolaýshylar kóligi jáne avtomobıl joldary basqarmasy, Jol polıtsııasy basqarmasy men QFF halyqaralyq tájirıbelerdi zerttep, zerdeleı kele matchtarǵa jetý joldarynyń syzbasyn jasady.
Máselen, «Astana -Arena» alańyna jankúıerlerdiń jekemenshik kólikpen kelýine shekteý qoıylady. Halyqaralyq talaptarǵa sáıkes shekteý boıynsha jumystar matchtyń bastalýyna 5 saǵat qalǵannan bastap júrgiziledi. Qabanbaı batyr dańǵyly - Jánibek pen Kereı kóshesi (№23-shi kóshe) - Turan dańǵyly - №27-shi kóshelerinde qozǵalystar múlde toqtatylady.
Qala turǵyndary men qonaqtaryna match ótip jatqan ýaqytta áýejaı men qala ortalyǵyna jáne keri baǵyt boıynsha júrýge bolatyn aınalma joldar usynylyp otyr: Syǵanaq - Orynbor - №27 kósheler arqyly Qabanbaı batyr dańǵylyna shyǵýǵa bolady. Sondaı-aq Qabanbaı batyr dańǵylyna Dostyq - Orynbor - №27-shi kósheler arqyly; Qonaev - Orynbor - №27-shi kósheler arqyly; Saraıshyq - Orynbor - №27-shi kósheler arqyly jetýge bolady.
