Fýtboldan Eýropa chempıonaty: Vengrııa men Frantsııa 33 jyldan keıin teń tústi
NUR-SULTAN. QazAqparat - Búgin fýtboldan Eýropa chempıonatynyń fınaldyq satysynyń toptyq kezeńi ekinshi týrynda Vengrııa men Frantsııa kezdesti, dep habarlaıdy QazAqparat tilshisi.
Eske salsaq, atalǵan eki qurama F tobynda synǵa túsedi. Qarsylastary – Portýgalııa men Germanııa.
Alǵashqy týrda Frantsııa Germanııadan 1:0 esebimen basym tússe, Vengrııa Portýgalııaǵa 0:1 esebimen jol berdi.
Eki qurama buǵan deıin 25 márte kezdesti. Onyń 14-de vengrler jeńiske jetip, 8-de frantsýzdar basym tússe, qalǵanynda teń nátıje tirkeldi.
Búgingi kezdesýde oıyn basynan frantsýzdar alǵa qaraı umtyldy. Gol soǵatyn birneshe múmkindigi bolǵan edi. Degenmen ony paıdalana alǵan joq. Esesine birinshi kezeńniń sońyna taman Vengrııa sapynan Attıla Fıola óz quramasyn alǵa shyǵardy.
Ekinshi kezeńde frantsýzdar tarazy basyn teńestirý jolyn izdedi. Nátıjesinde 66-mınýtta Antýan Grızmann mergendik tanytty.
Kezdesýde qos qurama 1:1 esebine qanaǵat bildirip tarasty.
Aıta keteıik, eki qurama 1988 jyldyń 27 sáýirinde ótken Eýropa chempıonaty irikteý kezeńinde 2:2 esebimen teń túsken edi. Sodan bergi eki kezdesýde de Frantsııa jeńiske jetken bolatyn.
Eske salsaq, atalǵan toptaǵy taǵy bir kezdesýde elorda ýaqytymen 00.50-de Portýgalııa men Germanııa sheberlik baıqasady.
Bul toptaǵy úshinshi týrda 23 maýsymda Germanııa men Vengrııa, Portýgalııa men Frantsııa jasyl alańǵa shyǵady.
