Fýtboldan Eýropa chempıonaty: Ýkraına shırek fınalǵa shyqty
NUR-SULTAN. QazAqparat - Fýtboldan Eýropa chempıonatynyń shırek fınalyna joldama alǵan quramalar tolyqtaı anyqtaldy, dep habarlaıdy QazAqparat tilshisi.
Dúbirli dodanyń 1/8 fınalyndaǵy sońǵy kezdesýde Shvetsııa men Ýkraına jasyl alańǵa shyqty.
Eki qurama buǵan deıin 4 márte kezdesti. Onyń 1-de Shvetsııa basym túsip, 2-de Ýkraınanyń mereıi ústem boldy, qalǵanynda teń nátıje tirkeldi.
Eki qurama búgingi kezdesýge tas-túıin daıyndyqpen keldi. Ýkraına óziniń tarıhynda tuńǵysh ret qurlyqtyq dodanyń mundaı satysynda baq synap otyr. Sondyqtan jankúıerlerin qýantýǵa bar kúshin salatyny anyq edi.
Esepti alǵash bolyp ýkraınalyq fýtbolshylar ashty. Kezdesýdiń 27-mınýtynda Aleksandr Zınchenko esep ashsa, oǵan 43-mınýtta shvetsııalyq Emıl Forsberg bir golmen jaýap qaıyryp, tarazy basyn teńestirdi.
Negizgi kezeń 1:1 esebimen teń aıaqtalyp, oıyn overtaımǵa ulasty. Overtaımnyń sońǵy 120-mınýtynda ýkraınalyq Artem Dovbık jeńis golyn soqty. Osylaısha Ýkraına óziniń tarıhynda alǵash ret qurlyqtyq dodanyń shırek fınalyna shyqty.
Eske salsaq, endi shırek fınalda 2 shildede Shveıtsarııa men Ispanııa, Belgııa men Italııa kezdesse, 3 shildede Chehııa men Danııa, Anglııa men ÝKraına sheberlik baıqasady.
