Fýtboldan Eýropa chempıonaty: Shvetsııa kósh basyna shyqty

NUR-SULTAN. QazAqparat - Fýtboldan Eýropa chempıonatynyń fınaldyq satysynyń toptyq kezeńi ekinshi týrynda Shvetsııa men Slovakııa kezdesti, dep habarlaıdy QazAqparat tilshisi.

Eske salsaq, atalǵan eki qurama E tobynda synǵa túsedi. Qarsylastary – Ispanııa jáne Polsha.

Alǵashqy týrda Slovakııa Polshadan 2:1 esebimen basym tússe, Shvetsııa Ispanııamen 1:1 esebimen teń tústi.

Eki qurama buǵan deıin alty márte kezdesti. Onyń úsheýinde shvetsııalyqtar jeńiske jetse, úsh kezdesýde teń esep tirkeldi.

Búgingi kezdesýde eki quramanyń da jeńiske jetý múmkindigi zor boldy. Dese de kóp ýaqytqa deıin esep ózgerissiz turdy.

Oıynnyń 77-mınýtynda Slovakııa qaqpasyna belgilengen penaltıdi Emıl Forsberg múltiksiz oryndady. Budan keıin qaýipti birneshe sát týyndady. Soǵan qaramastan ony eshkim golǵa aınaldyra alǵan joq.

Kezdesýde Shvetsııa quramasy qarsylasynan 1:0 esebimen basym tústi. Eki oıynnan keıin tórt upaı jınaǵan olar týrnır kestesinde kósh basyna shyqty.

Bul toptaǵy ekinshi týrdyń taǵy bir oıyny Ispanııa men Polsha arasynda 19 maýsymda bolady.

Aıta keteıik, endi atalǵan toptaǵy úshinshi týr oıyndary 23 maýsymda ótkiziledi. Bul kúni Ispanııa men Slovakııa, Shvetsııa men Polsha quramalary sheberlik baıqasady.