Fýtboldan Eýropa chempıonaty: Reseı Fınlıandııadan basym tústi
NUR-SULTAN. QazAqparat - Fýtboldan Eýropa chempıonatynyń fınaldyq satysyndaǵy toptyq kezeńi ekinshi týrynda Reseı men Fınlıandııa quramalary kezdesti, dep habarlaıdy QazAqparat tilshisi.
Eske salsaq, atalǵan eki komanda V tobynda synǵa túsedi. Qarsylastary – Belgııa jáne Danııa.
Alǵashqy týrda Reseı Belgııaǵa 0:3 esebimen jol berse, Fınlıandııa Danııadan 1:0 esebimen basym tústi.
Eki komanda buǵan deıin bes márte kezdesken. Onyń tórteýinde reseılikter jeńiske jetse, bireýinde fınlıandııalyq fýtbolshylardyń mereıi ústem boldy.
Aıta keterligi, Fınlıandııa búgingi qarsylasyn 109 jyl buryn Stokgolm Olımpıadasynda 2:1 esebimen jeńgen bolatyn.
Búgingi kezdesýde qos quramanyń jeńiske jetý múmkindigi bar edi. Ekeýiniń de tarapynan gol soǵatyn birneshe sát kezdesti.
Birinshi kezeńniń 45-mınýtynda reseılik Alekseı Mıranchýk qarsylastar qaqpashysyn qapy qaldyryp ketti.
Ekinshi kezeńde ekeýinde de esepti ózgertetin birneshe múmkindik bolǵan edi. Degenmen tablodaǵy esep ózgerissiz qaldy.
Kezdesýde Reseı qarsylasynan 1:0 esebimen basym túsip, týrnır kestesindegi jaǵdaıyn jaqsartty.
Sondaı-aq, atalǵan toptaǵy Danııa men Belgııa kezdesýi 17 maýsymda elorda ýaqytymen 21:50-de ótkiziledi.
Aıta keteıik, atalǵan toptaǵy úshinshi týr oıyndary 21 maýsymda ótkiziledi. Bul kúni Fınlıandııa men Belgııa, Reseı men Danııa quramalary sheberlik baıqasady.
